DILI, 05 Juñu 2026 (TATOLI) — Sekretáriu Adjuntu ba Asuntus Ázia Leste no Pasífiku Michael George DeSombre konklui vizita loron rua mai Timor-Leste iha loron 4-5 Juñu 2026, hodi reafirma parseria entre Estadus Unidus Amérika no Timor-Leste no avansa kooperasaun kona-ba prioridade rejionál no globál hamutuk.
Durante nia vizita, Sekretáriu Adjuntu DeSombre hasoru malu ona ho Prezidente Ramos-Horta hodi halo diskusaun kona-ba dalan hirak ba kooperasaun bilaterál ne’ebé di’ak liután, estabilidade rejionál, no Timor-Leste nia envolvimentu iha forum rejionál no internasionál.
Nia mós hasoru malu ho Primeiru-Ministru Gusmão hodi avansa kolaborasaun kona-ba prioridades hamutuk no subliña amizade kleur ona entre nasaun rua ne’e.
Vizita ne’e koinside ho Estadus Unidus Amérika nia komemorasaun independénsia Amérika nian ba dala 250 – Amérika nia Liberdade 250 – hodi reforsa valór hirak ne’ebé fahe ba malu hanesan liberdade, demokrasia, soberania, no autodeterminasaun ne’ebé sai aliserse forte ba E.U.A.-Timor-Leste nia parseria.
Estadus Unidus Amérika iha nafatin kompromisu atu serbisu hamutuk ho Timor-Leste hodi hametin ligasaun bilaterál, apoia envolvimentu rejionál, no avansa objetivu komun sira ba pás, seguransa, no prosperidade iha rejiaun Indo-Pasífiku laran.
Michael G. DeSombre simu pose nu’udar Sekretáriu Estadu Adjuntu (MNE E.U.A.) ba Asuntus Leste Aziátiku no Pasífiku iha loron 10 Outubru 2025. Molok ida-ne’e, Sekretáriu Adjuntu DeSombre hala’o kna’ar hanesan sósiu ida iha eskritóriu internasionál advogadu Sullivan & Cromwell, iha ne’ebé nia lidera Prátika Fuzoens no Akizisaun iha Ázia, hamutuk ho firme ne’e nia Prátika iha Korea no Sudeste Aziátiku. Sekretáriu Adjuntu DeSombre rekoñesidu nu’udar ida entre advogadu prestijiadu sira ba fuzoens & akizisoens no kapitál privadu iha mundu. Sekretáriu Adjuntu DeSombre hela ona iha Ázia durante tinan 25 resin.
Husi tinan 2020 to’o 2021, Sekretáriu Adjuntu DeSombre serbí ona nu’udar Embaixadór Estadus Unidus Amérika ba Tailándia. Nia moris iha Illinois, nia halo-hotu nia Lisensiatura iha Ekonomia Kuantitativa no Mestradu ida iha Estudus Leste Aziátiku husi Universidade Stanford. Nia gradua ho louvór magna cum laude iha tinan 1995 husi Fakuldade Direitu Harvard nian. Sekretáriu Adjuntu DeSombre ko’alia lian Xinés Mandarin fluente, no bele mós konversa iha lian Koreanu no Japonés.
Jornalista: Camilio de Sousa
Editór: Filomeno Martins
