MALÁZIA, 15 Juñu 2026 (TATOLI)—Prezidente Repúblika, José Ramos-Horta, hato’o mensajen hodi konvida ema hotu liuliu joventude atletizmu atu partisipa iha eventu Dili Internasionál Maratona 2026 ne’ebé sei hala’o iha Timor-Leste iha Agostu 2026.
Notísia Relevante: Palásiu Prezidensiál-MJDAK halo preparativu ba eventu Dili Internasionál Maratona 2026
Prezidente Repúblika, José Ramos-Horta, mós rekoñese atletizmu sira liuliu hirak ne’ebé seidauk iha esperiénsia viajen bele partisipa eventu internasionál ida-ne’e.
“Iha oportunidade ida-ne’e ba sira bele ba haree rai Timor nia furak, nia emar sira no timoroan sira sente bem-vindu tebes ho imi-nia prezensa,” Prezidente Repúblika informa iha W-Hotel Kuala Lumpur, Malázia, ohin.
Xefe Estadu ne’e hateten, iha eventu ida-ne’e sira bele halai maratona iha kategória oioin hanesan ba labarik iha kilómetru 10, fun run (5km), half marathon (21.1 km) no full marathon (42.195 km), entaun depende imi mak hili (opsaun).
“Bainhira imi ba lori ho imi-nia família ami sei halo akomodasaun ba labarik sira iha kategória children marathon. Maibé karik ita-boot sira rasik mak hakarak partisipa bele halai iha full marathon,” nia hateten.
Tanba ne’e, Prezidente Ramos-Horta hateten, nia sei hein no haree sira-nia prezensa iha Timor-Leste.
Antes ne’e, iha 08 Novembru 2025, Prezidente Federesaun Atletiku Timor-Leste (FATL) Afrânio Xavier Amaral, hala’o enkontru ho Prezidente Republika, José Ramos-Horta, iha Palasiu Prezidensial Aitarak laran hodi aborda kona-ba Dili International Maratona neʼebé planeia atu hala’o iha fulan-Agostu 2026.
Prezidente FATL, Afrânio Xavier Amaral, konfirma katak Xefe Estadu fó ona diretiva klaru atu federasaun atu prepara ho másimu ba eventu ne’e.
“PR fó konvite ofisiál ba ami iha ami-nia enkontru, neʼebé nia husu atu ami hahú elabora programa ho loron fixu, ne’ebé la bele negosia. Eventu sira-ne’e planu atu akontese iha semana daruak Agostu 2026, iha Timor-Leste,” Afrânio hatete ba jornalista sira iha Palásiu Prezidensiál Nicolau Lobato iha Bairro Pite.
Nia aumenta tan katak eventu ne’e sei organiza ho kolaborasaun hamutuk ho federasaun nasionál ASEAN sira no organizasaun atletizmu globál sira. Dili Maratona sei rekoñese nu’udar eventu internasionál iha kalendáriu mundiál, hanesan atividade boot sira seluk iha mundu.
“Nune’e ami sei servisu besik ho ASEAN no federasaun internasionál sira atu koordena esforsu sira,” nia dehan.
Afrânio mos fó sai katak partisipasaun sei nakloke ba ema hotu, laiha limitasaun rejistu, fó benvindu ba atleta lokál no internasionál sira.
Notísia Relevante: Atleta Ermera domina sai Selesaun Nasionál atu Kompete iha Dili Internasionál Maratona
Jornalista : Alexandra da Costa
Editór : Cancio Ximenes
