DILI, 09 Maiu 2026 (TATOLI)—Époka Maratona Internasionál Dili (DIM) 2026, hahú sábadu (09 Maiu) ne’e ho Meia-Maratona Selesaun Nasionál, ne’ebé hala’o iha rute kosta (tasi-ibun) foun ne’ebé simu ona sertifikasaun internasionál ne’e domina husi atleta maihusi Glenu-Ermera.
Notísia Relevante: FATL sei realiza kurrida maratona prepara ba eventu Dili Internasionál Maratona 2026
Eventu ne’e kumesa ofisialmente lansa husi Xefe Casa Civil Prezidénsia Repúblika, Henriqueta Maria da Silva, akompañadu husi Sekretáriu Estadu Floresta no Diretor Nasionál husi Ministériu Juventude, Desportu, Arte no Kultura.
Inísiu kmanek ida-ne’e marka mudansa profisionál ba desportu Timor-Leste nian, uza teknolojia avansada kronometrajen eletrónika RFID hodi garante standar kompetitivu mundiál ba atleta elite na’in-200 resin.
Atleta sira husi foho Gleno (Ermera) domina kompetisaun ida-ne’e, hodi manán fatin dahuluk iha kategoria mane no feto. Iha korrida mane nian, Jaqueo de Deus iha pozisaun primeiru, tuir kedas husi atleta olímpiku Felisberto de Deus, enkuantu Angela F. de F. Araujo lidera iha kategoria feto ho rezultadu ne’ebé di’ak.
Dezempeñu elite sira-ne’e prova duni Prezidénsia nia vizaun estratéjika atu aproveita Timor-Leste nia jeografia foho nian ne’ebé úniku hodi dezenvolve atleta nivel mundiál ne’ebé kbiit ona atu kompete iha palku internasionál.
Iha serimóniane’e, Prezidente Repúblika, José Ramos-Horta, fó parabéns pesoál ba manán-na’in sira no anunsia planu treinamientu kmanek nian. Atleta na’in 10 ne’ebé di’ak liu husi kategoria ida-idak, hamutuk ho rezerva na’in rua ba mane no feto (atleta 24 hamutuk), sei haruka ba “kuarentena” residensiál iha Sentru Treinamientu Gleno.
Kampu treinamientu intensivu ne’e dezeña hodi banati-tuir modelu treinamientu husi poténsia mundiál sira hanesan Kénia no Etiópia, hodi garante katak atleta sira ne’ebé hili ona ne’e bele to’o iha sira-nia potensiál fizio-lójiku ne’ebé aas liu antes hasoru kompetisaun internasionál iha maratona prinsipál iha fulan-Agostu oin mai.
Aleinde kurrida, eventu ne’e mós foti tema DIM 2026 nian, “Hadomi ita-nia ai-laran no ita-nia balada fuik”, mensajen ida-ne’ebé sai forte liután ho kooperasaun husi autoridade desportu no floresta nian. Kampaña nasionál ne’e integra konservasaun ambientál ho kmanek desportivu enkuantu rain prepara aan atu simu partisipante na’in 7.000 resin ba Maratona Internasionál Dili ne’ebé sei hala’o iha loron 08 Agostu 2026.
Selesaun Nasionál: Rezulatdu Ofisiál TOP 10
Rezulatdu ofisiál TOP 10 liuliu iha kategoria mane mak hanesan Jaqueo de Deus (Gleno)—01:12:02, Felisberto de Deus (Gleno)—01:12:28, Joanito Fernandes (Hera)—01:16:01, Victorino Martins da Costa (Ailok-Laran)—01:16:20, Estaqui Fernandes Carlos (Quintal-Boot)—01:18:42, Rogerio Mau Buti D.S. do Rego (Kintal-Bo’ot)—01:18:57, Paskoal de Deus (Gleno)—01:20:00, Nicolau Borges da Silva (Maubara)—01:21:27, Cornelio Martins da Cruz (Manleuana)—01:21:48 no Rosalino Ximenes (Gleno)—01:22:24.
Rezulatdu ofisiál TOP 10 liuliu iha kategoria feto mak hanesan Angela F. de F. Araujo (Gleno)—01:32:32, Abita de Jesus (Gleno)—01:32:38, Joan Pasia (Delta 1)—01:39:43, Ligia Fraga Correia (Gleno)—01:40:44, Juvita Soares (Becora)—01:45:49, Sandra Salsinha (Gleno)—01:54:25, Rubia Fatima Martins (Beto)—02:11:28, Catarina Barbosa (Fatuhada)—02:11:59, Lola Gonçalves Gama (Mascarinhas)—02:17:35 no Mariana Gusmão Martins (Moris-Foun)—02:20:38.
Entretantu, aleta na’in-10 ne’ebé di’ak-liu no rezerva na’in-rua (2) husi kategoria ida-idak sei muda ba Sentru Treinamientu Gleno hodi hala’o preparasaun intensiva ba Maratona Prinsipál ne’ebé sei realiza iha 08 Agostu 2026 ne’e.
Notísia Relevante: Palásiu Prezidensiál-MJDAK halo preparativu ba eventu Dili Internasionál Maratona 2026
TATOLI
