DILI, 06 Juñu 2026 (TATOLI) – Jogadór Benyamin Soares (99) sai eroi ba nia ekipa istimada husi Munisípiu Ermera, Weasel FC, basá hakoi nia adversariu Lica-Lica Lemorai FC nia mehi ne’ebé hakarak atu promove an ba Primeira Divizaun Liga Futeból Timor-Leste (LFTL) iha tinan ida-ne’e.
Esperansa atu hakat bá ne’ebá trava tiha husi golu Benyamin iha minutu 74, ekipa husi Munisípiu Vikeke ne’e labele ultrapasa ba Primeira Divizaun.
Jogu ba ekipa rua iha sábadu kalan iha Estádiu Munisipál Dili hanesan jogu kontinuasaun LFTL époka 2026, Segunda Divizaun.
Ho vitoria ne’e mak fó sasin katak ekipa ho naran istimadu Lakuten husi Ermera iha duni forsa hafoin promove husi Terseira Divizaun iha tinan kotuk no konsege impede ekipa jigante ne’ebé tinan barak ona hela iha Segunda Divizaun.
Lica-Lica nia mehi atu hakat ba Primeira Divizaun ne’e tanba iha tabela klasifikasaun provizóriu grupu B lidera husi Hibers FC ho pontu 7, tuir kedan Lica-Lica ho pontu 4, AC Mamura ho pontu 4, no Weasel ho Acdémica FC mak iha tabela kraik liu.
Nune’e, Lica-Lica garante atu manán Weasel, no hatuur pontu hanesan ho Hibers ne’ebé iha jogu ikus kontra Hibers mak manán bele liu ona ba Primeira Divizaun, maibé dezeju ne’e hela tanba Weasel mak sai xave determinasaun.
Tanba ne’e, fó kedan oportunidade ba Mamura atu hadau malu ho Hibers iha jogu aban domingu (07/06) iha Estádiu Munisipál Dili, no sé mak manán garante ona atu ultrapasa ba Primeira Divizaun.
Durante jogu, Weasel halo presaun maka’as hasoru Lica-Lica, jogadór sira lansa bola bá-mai husi ain ba ain, maibé forsa entre ekipa rua la hanesan. Avansadu Lica-Lica la nonook, lansa atake maka’as hasoru Weasel, maibé sutu hirak ne’e nunka kona iha alvu no sutu balun guarda-rede Weasel salva ka baku sai.
Weasel nia avansadu mós la nonook, lansa atake ne’ebé adekuadu, maibé defeza Lica-Lica metin, defeza sira halo dezmantela ba sira-nia área blokeia husu liña ba liña, susar atu prodús golu.
Ho nune’e, to’o minutu primeira parte termina laiha golu ruma akontese no rezultadu provijzóiu 0-0.
Kontinua ba segunda parte, ekipa ne’ebé lidera husi treinadór Nelson Soares, Lica-Lica Lemorai, halo mudansa ba jogu ho formatu 4-3-3, maibé labele sobu nafatin defeza Weasel nian.
Treinadór Weasel Henrique Xavier la muda nia estratéjia jogu, kontinua ho formatu anteriór 4-4-2. Formatu ne’e konsege fó sorte ba sira tanba konsege lees duni rede Lica-Lica iha minutu 74 liuhuai jogadór Benyamin Soares bainhira simu bola ne’ebé pasa sala husi defeza Lica-Lica, nia la trava no lansa sutu hasoru kedan, bola halai sa’e aas no monu loos iha guarda-rede Lica-Lica Timotofilo Romulo (42) nia kotuk hodi rezulta golu. 1-0.
Lica-Lica la lakon esperansa, kontinua hatudu jogu, maibé laiha ritmu ne’ebé asa, jogadór sira pasa bola bámai, laiha tan ekipa ida prodús golu to’o árbitu finál lian, jogu kompleta ona minutu 90+4, no termina ho rezultadu 1-0.
Jogu ne’e lidera husi árbitru Pedro Carvalho, juíz liña Paulo da Costa, Ricardo Amaral no árbitru rezerva João Paulo.
Durante ámbitu jogu Pedro Carvalho konsege fó kartaun kinur ba jogadór Lica-Lica Joanico Noronha (15) iha minutu 23 tanba halo erru hasoru jogadór Weasel.
Entretantu, Benyamin Soares (99) simu kartaun kinur iha minutu 28 tanba suta bola lakona no halo falta hasoru defeza Lica-Lica. Romário Florindo (17) simu kartaun kinur bainhira halo erru hasoru jogadór médiu Lica-Lica Ivo Pinto (22) iha minutu 40. Iha minutu ikus, 86, Júlio Pires (18) hetan kartaun kinur tanba finji monu maibé la’os tebe husi jogadór adversáriu.
Dadaun ne’e Weasel rekolla ona pontu 3 husi joga dala-tolu, lakon rua no manán ida. Kontinua hela iha pozisaun dahaat tabela klasifikasaun provizóriu grupu B.
Skuad Lica-lica Lemorai FC
Timoteofilo Romuldo (42), Henrique da Costa (29), Demelson Arcanjo (24), Tonito Belo (23), Jaserlito de Jesus (26), David Correia (28), Jonas Savio (19), Ivo Pinto (22), Tonzo Madeira (6), Diogo Soares (7), Nencio Fernandes (11).
Jogadór Suplente
Januário Alves (30), Lúcio Barros (21), Zenio Soriano (13), Armindo Amaral (20), Joanico Noronha (15), Florindo Pinto (8), Kevin Fernandes (12), Faviano Esteves (27), Jacob Gome s(5), Mario Qefi (17), Plácido Nascimento(25), Jyzeus Vong (18), Mário Freitas(10), no Rui Freitas (9).
Ekia Weasel FC
Agustinus Bere (30), Yermias Bria (15), Emildio Casimiro (4), Florindo Fernandes (2), Julião Pires (18), Alexandre Martins (77), Nilton de Jesus (49), Benyamin Soares (99), Deonizio Martins (6), Richard Bere (9), Romário Florindo (17).
Jogadór Suplente
João Madeira (1), Janel Araújo (10), Crisongno Salsinha (12), Nuncio Exposto (16), Olívio Gonçalves (13), Josevaldo Salsinha (8), Frenki Mali (21), Domingos Lemos (22), Anuncio de Deus (19), Eliazer da Silva (11), Leonio Casmiro (3), Marcos Gonçalves (7) no Bendito Lemos (25).
Jornalista: Hortêncio Sanchez
Editora: Maria Auxiliadora
