VIKEKE, 07 Juñu 2026 (TATOLI)-Xefe Departamentu Jestaun Risku Dezastre husi Autoridade Protesaun Sivíl (APC, sigla portugés), Eugénio Guterres, informa katak akontesimentu rai-nakdoko iha dadersán pur volta tuku 7h30, afeta uma rua no rai-monu iha foho Builó, ha postu administrativu Uatulari, munisípiu Vikeke.
“Ita simu ona informasaun katak uma rua iha postu Uatulari afeta husi rai-nakdoko. Nune’e, ami rejista no aban sei bá haree direta uma sira-ne’ebé hetan afeta husi rai-nakdoko”, Eugénio Guterres, hateten ba Tatoli, iha postu Vikeke Vila, ohin
Nia dehan APC sei bá halo verifikasaun iha terrenu molok determina medida apoiu emerjénsia ba vítima afetada sira.
“Akontese rai-nakdoko, uma fatuk nakfera iha parte laran, ida seluk nakfera to’o iha sinta rai nian. Uma rua ne’e ida iha foho Builó nia okos, husi suku Makadike-Uaitame no uma ida seluk ne’e iha aldeia Gomiuru, suku Makadike de Baixu”, nia esplika.
Eugénio akrexenta katak rai-nakdoko mós afeta ba foho Builó nian sorin monu, maibé APC seidauk simu informasaun ruma husi autoridade sira husi aldeia Uaibobo no Abana.
“Rai nakdoko ne’e afeta mós ba ita-nia foho Builó, ita-nia komunidade no uma sira, maibé ida-ne’e ita seidauk simu informasaun ruma husi autoriade. Ami mós sei tenta kontaktu sira”, dehan.
Iha sorin seluk, Administradór Postu Administrativu Ossú, José da Silva Amaral, hateten nia sei halo vizita direta bá área afetada hodi rekolla informasaun antes hato’o relatóriu ba Prezidente Autoridade Munisípiu Vikeke.
“Rai-nakdoko ne’e liu tiha veteranu Tera bulak informa kedas ba ha’u katak foho Builó monu, afeta mós ba komunidade no uma ida-ne’e mak ha’u seidauk hatene loloos. Tan ne’e, ha’u hakarak bá haree direta lai”, nia realsa.
Membru komunidade husi aldeia Builó, Celestino Trindade, relata katak rai-nakdoko iha dadersán tuku 7, nune’e komunidade trauma halai sai hotu bá rai tetuk no to’o agora foho Builó sei monu.
“Ami matabixu hela mak de repente rai-nakdoko, la kle’ur foho Builó sorin kuaze metru 15 monu tun, besik kedas ami-nia uma. Akontesmentu ne’e la afeta ba komunidade no la estraga uma. Maibé, sira trauma hotu ne’ebé agora sira bá hotu rai tetuk”, nia subliña.
Membru komunidade husi aldeia Uaibobo, suku Ossorua, postu Ossú, ne’ebé hela iha área Buaba ho totál 361 husi uma-ka’in-64.
Jornalista: Vitorino Lopes da Costa
Editora: Maria Auxiliadora
