DILI, 07 Juñu 2026 (TATOLI) – Ekipa AS Ponta Leste obrigadu tenke fahe pontu ho nia adversáriu Vila Ataúro FC, basá iha jogu kontinuasaun Liga Futeból Timor-Leste (LFTL) époka 2026 Segunda Divizaun ne’ebé realiza iha Estádiu Munisipál Dili, domingu kalan, empata 1-1.
Luta naruk ekipa rua halo, maibé ho forsa ne’ebé la diferente, muda jogu ne’e sai empata durante minutu 90+4.
Hanesan baibain jogu la’o bainhira árbitru huu apitu, ekipa rua lansa kedan kontra no atake ba malu tuir tékniku no abilidade jogadór sira-nian.
Vila Ataúro ne’ebé lidera husi nia treinadór Florindo Fereira halo atake ne’ebé ho velosidade maka’as halo Ponta Leste book-an susar, nune’e iha minutu 3 jogadór Narciso Sarmento (21) lansa ona golu liuhusi jogu indivíduu ne’ebé nia halo husi parte karuk no hatama bola ba rede laran. 1-0 ba Vila Ataúro.
Husi golu ne’e halo Ponta Leste ne’ebé lidera husi treinadór Canizio da Costa tenke fera kakutak halo estratéjia oioin. Maibé, jogu laiha mudansa, Ataúro nafatin domina bola, maibé sutu ne’ebé jogadór Ataúro halo la kona iha alvu no balun guarda-rede Ponta Leste salva.
Jogu la’o, maibé to’o apitu ikus segunda parte nian lian, laiha mudansa ba rezultadu no Ataúro lidera provizoriamente jogu ho 1-0.
Tama ba segunda parte, kontra no atake hahú manas liutan, Ponta Leste hatudu jogu ne’ebé ho ritmu maka’as halo ofensivu ka bola long barak liu, Ataúro halo jogu ho neneik, la ansi halo golu bainhira seidauk hetan oportunidade.
Esforsu Ponta Leste nian la hela de’it hanesan esforsu, sira joga duni no hatudu duni katak luta iha kampu laran la’ós indivíduu, maibé koletivu, sira joga ho unidade, kombina malu di’ak.
Husi kombinasaun di’ak ne’ebé Ponta Leste halo liuhusi formatu 4-3-3 ne’e fó duni rezultadu di’ak basá iha minutu 78 sorte di’ak monu ona ba Ponta Leste liuhusi jogadór Alberto Soares (23) hodi responde duni golu ida bainhira bola barullu iha liña oin Ataúro nian. Goluuu…1-1, rezultadu nakfilak ba empata.
Luta Ponta Leste nian termina, Ataúro halo atake, maibé la rezulta golu to’o apitu minutu 90+5 termina, laiha tan golu ruma no termina jogu ho 1-1.
Jogu ba ekipa rua hanesan kompleta de’it iha grupu A, basá ekipa rua ne’e mak okupa pozisaun ikus liu ho pontu ki’ik liu. Ponta Leste akumula de’it pontu 2 husi joga dala haat, Vila Ataúro akomula pontu 1 husi jogu dala haat. Enkuantu ekipa ne’ebé atu hadau malu ba Primeira Divizaun mak AD. Santo António ho FIEL FC. Santo António ho pontu 7 no FIEL 6. Iha jogu ikus entre ekipa rua empata Santo António mak avansa, maibé FIEL manán nia mak sei avansa ba Primeira Divizaun.
Jogu ne’e dirije husi árbitru Fernando da Costa, juiz liña António de Carvalho, Jorge Sarmento no árbitru rezerva Agustinho Mota.
Durante jogu árbitru Fernando da Costa konsege fó kartaun kinur ba jogadór husi Ponta Leste ne’ebé komete erru iha jogu laran mak hanesan Carol Martins (16) iha minutu 50, Dino Amaral (5) iha minutu 56, Julvito Nascimento (9) iha minutu 86, Edson dos Santos (66) iha minutu 89.
Enkuantu jogadór Ataúro ne’ebé hetan kartaun kinur mak Jonata Marques (26) iha minutu 50, Ronaldo Gusmão (20) iha minutu 66, Yenum Enumbe (13) iha minutu 73, Andrias Kayoi (2) iha minutu 86.
Ekipa AS Posta Leste
Jemecriz Pereira (99), Candido de Oliveira (77), Kon Kawahara (35), Dino Amaral (5), Nelson Ximenes (24), Francisco Costa (8), Carol Martins (16), Alberto Soares (23), Julvito Nascimento (9), Pedro da Costa (7), Ario Ximenes (11).
Suplente
Deonantino Madeira (32), Delivio dos Santos (70), Gabriel Belo (22), Leonardo da Costa (25), Armando Soares (19), Gaudêncio Osório (30), Cristiano de Deus (98), Manuel Cristo (10), Sebastião dos Santos (47), Cano Xavier (20), Edson dos Santos (66).
Ekia Vila Ataúro
Obadias do Carmo (99), Ronaldinho Gusmão (20), Noel dos Santos (12), Aristides Soares (22), Andrias Kayoi (2), Nando Tebai (8), Yosmus Dodai (11), Graciano Sarmento (5), José Fino Gusmão (4), Jonata Marques (26), Narcisio Sarmento (21).
Jogadór suplente
Bendito Vila Nova (77), Ricardo de Araújo (23), Wilson dos Santos (3), Yenium Enumbi (13), Teófilo Lima (9), Manajes Gomes (14), Osvaldo da Costa (24), Jacson do Rêgo (19), Leofigildo Barbosa (18), Silvestre Xavier (16), Agusto Soares (17), Jacinto de Carvalho (10), Hélio Soares (15), Hasan Ramos (7).
Notísia relevante: Trio Mamura nia erru fó vitória ba Hibers hodi hakat ba Primeira Divizaun
Jornalista: Hortêncio Sanchez
Editora: Maria Auxiliadora
