DILI, 10 Juñu 2026 (TATOLI)—Tribunál Judisiál Primeira Instánsia Dili (TJPID), Kuarta ne’e, la konsege halo alegasaun ba krime partisipasaun ekonomia no administrasaun danoza ne’ebé envolve husi Antigu Komandante Jerál Polísia Nasionál Timor-Leste (PNTL) na’in-tolu inklui na’in-ualu seluk iha tinan 2012.
Iha audiénsia julgamentu, Juíz Argentino hateten, tuir loloos audiénsia julgamentu ohin ne’e Tribunál halo alegasaun maibé tanba arguidu na’in-rua hanesan Antigu Komandante Jerál PNTL ho inisiál LM no HdC la partisipa, tanba ne’e tenke deside halo adiamentu ba alegasaun ba kazu ne’e.
Juíz ne’e pronúnsia katak, Arguidu LM molok ne’e halo justifikasaun katak nia ohin la mai partisipa iha alegsaun tanba kestaun serbisu balun iha estranjeiru. Enkuantu Arguidu HdC halo justifikasaun katak halo viajen bá estranjeiru hodi halo tratamentu saúde no nia iha juntamentu médiku.
Notísia relevante : Kazu fornesimentu farda no manutensaun ró, empreza deklara PNTL la halo reklamasaun
Juíz Argentino hateten, Tribunál fó prazu loron-lima ba Arguidu LM atu halo justifikasaun kle’an kona-ba nia auzénsia iha julgamentu.
Nune’e, Juíz mós husu atu Arguidu LM kumpre saida mak Tribunál hateten hodi husu Kuarta (17/06) semana oin bele marka prezensa iha alegasaun tanba konsidera katak alegasaun ne’e importante no husu Arguidu atu partisipa, se la partisipa mak Tribunál emite mandadu detensaun hodi detein arguidu.
Ministériu Públiku ne’ebé reprezenta husi Prokuradór Rafael Gusmão aseita ho justifikasaun arguidu na’in-rua.
Iha parte seluk, Defeza Arguidu LM, Advogadu Privadu João Sera, hateten, nia kliente labele partisipa iha julgamentu ohin tanba halo serbisu importante balun.
Nia dehan, kliente nia karta justifikasaun ne’ebé hato’o mai Tribunál ne’e konfidensiál.
Hafoin rona tiha parte hotu, Tribunál liuhusi Juíz koletivu deside halo adiamentu ba prosesu ne’e iha Kuarta (17/06) semana oin hodi kontinua ba alegasaun.
Jornalista : Natalino Costa
Editora : Julia Chatarina
