DILI, 11 Juñu 2026 (TATOLI) – Prezidente Komisaun A ne’ebé trata Asuntu Konstitusionál no Justisa, Natalino dos Santos, hateten presiza halo alterasaun ba Kódigu Prosesu Penál hodi define loloos kompeténsia Ministériu Públiku (MP) no Komisaun Anti-Korrupsaun (KAK).
Nia hato’o kestaun ne’e relasiona ho MP ne’ebé dada no la delega kazu korrupsaun ba KAK atu halo investigasaun. Tuir nia, MP mak na’in ba asaun penál no MP iha kompeténsia atu delega ba KAK, tanba ne’e depende ba artikulasaun husi sira.
Nia dehan katak karik prosesu sira ladún la’o mak MP dada filafila, maibé iha tempu badak Komisaun sei bolu atu haree kestaun ida-ne’e.
Tuir Komisaun nia haree, iha posibilidade atu altera lejislasaun vijente hodi define loloos kompeténsia instituisaun rua ne’e. “Karik presiza duni halo alterasaun hodi define loloos, ne’e polítiku ita bele haree”, nia hateten.
Deputadu ne’e afirma katak presiza duni hadi’a armonizasaun lei nune’e labele iha sobre-pozisaun iha serbisu. “Ha’u-nia haree, karik prosesu balun ne’ebé delega ba mak sira ladún tau atensaun, entaun difikulta prosesu halo akuzasaun Ne’e mak dalaruma Ministériu Públiku dada filafali”, dehan.
Daudaun KAK hala’o knaar rua ba prevensaun no investigasaun kazu korrupsaun liuhusi delegasaun kompeténsia husi MP.
Kestiona kona-ba alterasaun ne’e atu fó kompeténsia absoluta ba KAK no la presiza iha delegasaun maka deputadu ne’e lakohi fó komentáriu tanba ne’e iha desizaun polítika nian kolejiál iha Parlamentu.
Nia dehan iha posibilidade seluk mak lejizladór sira iha pensamentu balun haree atu muda filafali KAK ba komisaun prevensaun, enkuantu ne’e depende ba desizaun polítika.
Notísia relevante: Komisáriu CAC halo ona komunikasaun ho Prokuradór Jerál delega hikas kazu korrupsaun
Jornalista: Nelson de Sousa
Editora: Maria Auxiliadora
