DILI, 13 Juñu 2026 (TATOLI)—AS Marca FC no Assalam FC fahe pontu hafoin hala’o duelu nakloke ho rezultadu impata 2-2, iha jogu Primeira Divizaun Liga Futeból Timor-Leste (LFTL) époka 2026, ne’ebé hala’o iha Estádiu Munisipál Dili, Sábadu loraik ne’e.
Se vitória nu’udár símbolu atinjimentu no derrota nu’udár símbolu lisaun, mak rezultadu ne’ebé ekilibrada nu’udár símbolu prudénsia. Nia fó hanoin katak la’ós kompetisaun hotu-hotu terminada ho dominasaun—dalabalun ekilibrasaun ne’e sai rezultadu ne’ebé justu ba luta rua ne’ebé forte hanesan.
Jogu ne’ebé fahe porsaun balansa no dramátika ne’e hatudu katak ekipa rua mai ho ambisaun hakarak depozita pontu tolu maibé forsa ekilibrada ne’ebé sira iha obriga sira tenke kontente ho pontu ida de’it.
Bainhira hetan orientasaun husi árbitru Pedro Braga hodi hahú jogu, Assalam hahú kedas ho sira-nia kontra-atake iha minutu dahuluk. Presaun iha área Marca nian fó rezultadu iha minutu sia (9) bainhira Ricky Purmana aproveita fallansa iha liña traseira adversária nian hodi xuta maka’as loke rezultadu ba 1-0.
Hafoin sofre golu sedu, AS Marca la lakon esperansa. Jogadór sira esforsu maka’as oinsá buka dalan atu responde golu, maibé jogu la’o to’o minutu primeira parte nia rohan, laiha tan golu akontese. Vitória provizória hela ba Assalam.
Luku ba segunda parte, Marca nia esforsu sai duni realidade. Iha minutu 46, jogadór Oibo Godspower hetan oportunidade marka golu hodi muda rezultadu ba 1-1. Golu ida-ne’e lori ekipa rua hetan bukae ne’ebé ekilibrada.
Husi golu ne’e, halo intensidade jogu aumenta liután. Adeptu iha Estádiu Dili hakilar ho sira-nia maneira rasik ba sira-nia klube. Balun hakfuik hodi motiva sira-nia klube estimada. Seluk haklalak sunu jogadór sira-nia espíritu atu manán jogu.
Ho adeptu sira-nia haklalak no hakfuik ne’e, sunu liután Marca nia vontade. Vontade hetok aas. Iha minutu 53, sai duni minutu oportunu ba sira. Jogadór Célio Santos konverte jogada rápida hodi muda rezultadu ba 2-1. Gooolu. Adeptu rihun ba rihun tatoli sira-nia lian barullu hodi selebra golu prezente halo Estádiu Dili sai barullu hanesan iha merkadu.
Stop. Jogu sei naruk. Assalam seidauk rende. Nia (Assalam) sei bele konkista impata ka bele manán. Sira-nia esperansa hatudu duni iha asaun. Sira sevisu ho unidu no rápidu iha duut matak nia leten hodi duni esperansa.
Esforsu la hela de’it ho esforsu. Iha minutu 65 liuhusi jogadór Norberto da Costa, lori Assalam impata 2-2 ho Marca. Nia kruza xutu ida ba rede adversáriu no xutu ne’e sai duni vantajen hodi muda skor sai ekilibriu.
Minutu 25 ikus sai tebes duni xadrez. Sira rua izola malu ho tátika xadrez. La fó biban ba malu atubele konverte ekilibriu ne’e ba vitória. Infelizmente, juís teki-teki termina sira-nia servisu iha kampu. Tempu mak sai juís hodi termina katak ekipa rua nia bukae to’o de’it 2-2 durante minutu 90.
Ho impata ne’e, AS Marca ho Assalam rekolla pontu ida-ida iha tabela klasifikasaun provizória. Jornada tuirmai, ekipa rua tenke manán hodi la hakat dook-liu husi luta ba túr iha pozisaun leten aas.
Skuad AS Marca
Treinadór: José Fonseca
(30) Tonito Fernandes, (23) Nelson Castro, (16) Natanael Barros, (70) Akanmidu Friday, (99) Oibo Godspower, (17) Marcio Oliveira, (18) Joãozinho Amaral, (19) Florindo Soares, (8) Nyonky Estefanus, (11) Ezequiel da Cruz, (9) Celio Santos
Jogadór Suplente:
(1)José Gomes, (31) Domingos Vicente, (21) Henrikus Atok (12) Jaaniel Fernandes, (2) José Carlos, (5) Servinus Klau, (24) João dos Reis, (28) Filmario de Jesus, (29) Ricardo Martins, (22) Gabriel Pires (10) Gelvanio Alberto, (14) Fabrizio dos Santos
Skuad Assalam
Treinadór: Adu Marques
(12) Edilson Marques, (16) Norberto da Costa, (36) Riki Permana (26) Ivan Lay, (2) Jacob Maia, (23) Genario Soares, (24) Natalicio Soares, (20) Anito Fernandes, (79) José Fernandes, (19) Rivaldinho Gusmão, ( 11) Augusto da Costa
Jogadór suplente
(21) Maiki Miwa, (17) Bonarudin Amin, (9) Naomiki Takahashi, (4) Noezio dos Santos, (6) Gerefico da Silva, (25) Doni da Costa, (10) Akito Yoshikawa, (29) Adi Risaldi, (55) Lelicio da Silva, (66) Vincencio Fernandes, (7) Palencio Marques, (30) Rio Kato.
Jogu ne’e lidera husi árbitru prinsipál Pedro Braga, juiz liña Antonio carvalho, Donatos Portela no árbitru reserva Pedro Maia Carvalho.
Jornalista: Hortêncio Sanchez
Editór: Xisto Freitas da Piedade
