DILI, 14 Juñu 2026 (TATOLI)—Nia (Austrália) sempre monu iha palku Kopa Mundiál liuhusi viajen naruk. Tan ne’e, vitória 2-0 ne’ebé nia kolleta husi Túrkia, sente hanesan ultrapasa pontu tolu (3) ne’ebé nia akumula.
Hanesan reprezentante Áza Pasífika, Socceros halakan esperansa katak kbiit la’ós tenke moris husi tradisaun boot, maibé husi disiplina no brani. Perante poténsia ida husi poténsia futeból sira seluk Europa nian, Austrália prova katak anin husi kosta súl mós bele doko kontinente azúl (Europa) nia torre futeból.
Nia, Selesaun Nasionál Austrália, susesu iha nia jogu dahuluk Grupu D Kopa Mundiál FIFA 2026 bainhira halakon adversáriu Túrkia, liuhusi jogu ne’ebé realiza iha Estádiu BC Place Vancouver, Vancouver, Domingu ne’e.
Jogu la’o ho ritmu aas husi parte rua. Túrkia ho nia formasaun 4-2-3-1 tenta domina bola liuhusi H. Çalhanoğlu no Arda Guler iha meiu kampu, maibé Austrália nia defeza ne’ebé komanda husi Cameron Burgess konsege blokeia tentativa sira.
Iha ámbitu kontra-atake ne’ebé ho velosidade maka’as ne’e, avansadu Túrkia H. Çalhanoğlu lansa xutu lubuk ida maibé la kona alvu no salva husi guarda rede Austrália.
Jogu ne’ebé lidera husi árbitru Jesus Valenzuela husi nasaun Venezuela ne’e halo estádiu atu nakdoko sala-sala bainhira selebra golu dahuluk husi armada Austrália. Iha minutu 27 sai hanesan minutu osan-mean ba ekipa Kánguru liuhusi jogadór Nestory Irankunda ne’ebé simu bola iha meiu kampu, fura defeza Túrkia nian, tama ba área no xuta maka’as ne’ebé liu guarda-Rede U. Çakır nia liman, ikusmai bola semo borus guarde rede nia blokeiadu. Golu ne’e lori Austrália lidera 1-0.
Túrkia tenta responde imediata. Kerem Akturkoglu ho Baris Yilmaz fó ameasa dalaruma, maibé guarda-rede Austrália P. Beach salva tutuir. To’o tempu determinadu, rezultadu mantein 1-0 ho Austrália.
Tama ba segunda parte, Túrkia fó presaun maka’as liután. Treinadór Túrkia introdús jogadór foun hodi aumenta atake liuhusi Kerem Akturkoglu no Arda Guler. Túrkia hetan oportunidade dala tolu (3) iha minutu 50-60, maibé H. Souttar ho Cameron Burgess sempre iha fatin loos hodi foti bola.
Austrália halo joga kontra joga ho matenek. Treinadór Socceroos instrui jogadór atu halo defensivu ho formasaun 5-4-1. Ne’e hanesan maneira ida atu investe rigorozu iha defeza duké ofensivu ne’ebé bele loke oportunidade fali ba adversáriu.
Perante jogu la’o manas, iha minutu 75, jogadór P. Okon-Engstler iha meiu kampu ne’ebé fó pasa diagonál furak ba Nestory Irankunda iha leten, jogadór Irankunda lori bola bá kotuk no kruza didi’ak ba área penalidade. Bola liuhusi defeza Túrkia nia ain, to’o iha jogadór C. Metcalfe ne’ebé tama sein marka, ikusmai fura duni rede Túrkia. Rezultadu muda an imediatu ba 2-0.
Túrkia hahú enfrenta presaun psikolójika.Tanba sofre ona golu rua, Túrkia maski tenta fó presaun ikus liuhusi Baris Yilmaz no Abdulkerim, maibé Austrália nia defeza ho guarda-rede P. Beach la fó espasu. To’o apitu lian, Austrália sai duni na’in ba vitória 2-0.
Ho rezultadu ne’e, Austrália kolleta pontu tolu (3) no sa’e ba pozisaun daruak Grupu D hafoin Estadu Unidu. Túrkia sei luta fali iha jogu tuirmai atu buka nia pontu dahuluk.
Austrália – (5-4-1)
(3) A. Circati, (4) J. italiano, (5) J. Bos, (8) C. metcalfe, (9) Mohamed toure, (13) A. O’neill, (17) Nestory irankunda, (18) P. beach, (19) H. Souttar, (21) Cameron burgess, (24) P. Okon-Eng.
Túrkia -(4-2-3-1)
(2) Zeki Celik, (3) Merih Demiral, (6) Orkun Kokcu, (7) Kerem Akturkoglu, (8) Arda Guler, (10) H. Çalhanoğlu, (14) Abdulkerim, (16) Ismail Yuksek, (20) Ferdi Kadioglu, (21) Baris Yilmaz, (23) U. Çakır.
Jornalista: Hortêncio Sanchez
Editór: Xisto Freitas da Piedade
