BOBONARU, 15 Juñu 2026 (TATOLI) – Populasaun sira husu ba Ministériu Obra Públika (MOP) atu halo manutensaun ba estrada nasionál trosu husi Balibó bá to’o ponte Nunura, postu administrativu Maliana, munisípiu Bobonaru, ne’ebé hetan danus kauza husi dezastre naturál, tanba kondisaun estrada ne’e daudaun difikulta movimentasaun transporte públiku no privada.
Abitante Santino Lopes dehan iha pontu balun estrada ne’e hela de’it espasu ba karreta ida atu liu, ne’ebé aumenta risku ba utilizadór sira, liuliu bainhira udan monu-rai.
Notísia relevante: Xefe suku Leo-lima husu IGE normaliza estrada Balibo-Maliana
“Hanesan iha kurva sa’e bá Ai-Asa, karreta no motór hasoru malu ladún di’ak. Bainhira udan monu, karreta liu susar. Komunidade mak ho inisiativa rasik tau fatuk no ai atu fasilita karreta liu”, nia dehan ba Tatoli iha Nunura, segunda-feira ne’e.
Maski Governu aterru rai iha área balun, maibé solusaun ne’e seidauk permanente tanba bele estraga filafali bainhira tempu udan.
“Ha’u hanoin di’ak liu Governu halo bronjong, depois tau fali ho asphalt, atu estrada ne’e bele dura kle’ur no la presiza gasta osan ba aterru repetidamente”, nia sujere.
Motorista Joaquim Afonso solisita ba Governu atu tau prioridade ba manutensaun tanba dalan ne’e liga ho fronteira no sai hanesan porta entrada ba ema husi nasaun viziña Indonézia.
Hanesan komunidade nia apresia esforsu Governu ne’ebé hadi’a ona estrada husi Batugadé to’o Balibó Vila, maibé hein katak serbisu ne’e bele kontinua ba trosu Balibó–Nunura no Maliana.
“Se estrada hotu-hotu di’ak, ema husi nasaun seluk bele hareenia katak Timor-Leste dezenvolvimentu la’o duni. Se la’e ita haree ladún di’ak. Agora, iha parte balun mak aterru de’it ho rai, balun nakfera no ku’ak filafali. Karreta ki’ik sira liu la di’ak tanba badak bee okos kona”, motorista ne’e dehan.
Komunidade fiar katak intervensaun permanente ba estrada Balibó–Maliana bele garante seguransa ba utilizadór sira no fasilita movimentasaun ema no sasán entre área sira iha Bobonaru.
Foin lalais ne’e Governu orienta ona empreza balun halo normalizasaun ba estrada husi Nunura no Balibó ne’ebé hetan danus husi rai-halai, hafoin akontese udan ho intensidade boot.
Notísia relevante: Deputadu sira ‘triste’ haree direta kondisaun estrada Balibo-Maliana
Jornalista: Sergio da Cruz
Editora: Maria Auxiliadora
