DILI, 18 Juñu 2026 (TATOLI)-Komisaun G ne’ebé trata Asuntu Edukasaun, Juventude, Desportu, Kultura no Sidadania, finaliza ona diskusaun faze espesialidade ba proposta lei númeru 24/VI(3a)- Rejime Jurídika Arte Marsiál, no hein diskusaun no aprovasaun iha finál globál.
Prezidente Komisaun G, Armando Lopes, hateten Komisaun aprova ona relatóriu no pareser ba rezultadu diskusaun espesialidade nian ne’ebé hala’o iha Líkisa durante loron lima hamutuk ho Ministériu Interiór, no Ministériu Juventude Desportu, Arte, no Kultura.
Hola parte mós husi Komisaun A ne’ebé trata Asuntu Konstitusionál no Justisa, Komisaun B ne’ebé trata Asuntu Defeza Seguransa no Negósiu Estranjeiru.
“Aban, ami submete ona ba meza Parlamentu. Iha tersa [semana oin] bele halo diskusaun no aprovasaun finál globál”, nia hateten.
Bainhira lejizlasaun ne’e aprova no lori ba Prezidente Repúblika promulga sei hahú implementa hodi regula di’ak liután prátika arte marsiál no rituál iha Timor-Leste.
“Tuir rezolusaun Governu nian kontinua suspende atividade prátika arte marsiál, maibé iha indivíduu balun kontinua treinu subar, tanba ne’e lei promulga sei implementa hodi regula”, dehan.
Tuir planu, Governu no Komisaun sei halo uluk sosializasaun ba lejizlasaun foun ne’e iha territóriu nasionál.
Notísia relevante: http://Parlamentu aprova proposta Lei Prátika Arte Marsiál
Jornalista: Nelson de Sousa
Editora: Maria Auxiliadora
