BAUKAU, 18 Juñu 2026 (TATOLI)–Sekretariadu Tékniku Administrasaun Eleitorál (STAE) hahú sosializa no rekolla informasaun kona-ba kondisaun ne’ebé kategoriza nu’udár preparasaun pré eleitorál iha Munisípiu Baukau.
Diretór STAE Baukau, Natividade Freitas Guterres, esplika atividade referida nu’udár preparasaun pré eleisaun iha-ne’ebé antes ne’e simu orientasaun husi nasionál liuhusi kooperasaun entre liña ministeriál ne’ebé foku ba identifikasaun sentru votasaun no kondisaun iha baze ne’ebé lokaliza iha postu administrativu ualu.
“Ita hahú uluk ona iha Postu Baguia, maibé ne’e foin faze identifikasaun. Hotu mak ita relata ba nasionál,” Diretór STAE Baukau infroma ba TATOLI iha ninia kna’ar fatin, Vila Nova, Kinta ne’e.
Natividade Freitas relata prosesu sosializasaun iha baze hahú dahuluk iha postu Baguia hanesan kondisaun estrada hetan estragu iha área Haekoni, Larisula to’o Afaloikai no fatin risku konflitu iha Suku Larisula no Samalari.
Aleinde ne’e, atividade hanesan tuir planu sei kontinua tan iha postu hitu seluk ho fatór sira hanesan identifika kondisaun estrada, lokál krime no sentru votasaun.
Relatóriu ba asuntu ne’e sei hato’o bá nasionál liuliu instituisaun relevante atu responde hanesan Ministériu Obra Públika (MOP) parte estrada, Ministériu Agrikultura atu apoia tratór hodi transporta materiál eleisaun bainhira iha kondisaun emerjénsia, Ministeiru Transporte no Telekomunikasaun relasiona ho liña internet no seluk tan tuir idaidak nia responsabilidade.
“Tempu sei sufisiente ba ita atu halo preparasaun tanba tuir kalkulasaun posibilidade eleisaun prezidensiál sei hala’o iha fulan-Marsu 2027,” Natividade Guterres akresenta.
Entretantu, tuir dadus, totál eleitór iha Baukau hamutuk 107.261 kompostu husi sira-ne’ebé iha kartaun biométriku hamutuk 40.159 korresponde ba pursentu 37.44 no eleitór hamutuk 67.102 mak kategoria seidauk iha kartaun biométriku.
Jornalista: Natalino Belo
Editór: Xisto Freitas da Piedade
