DILI, 18 Juñu 2026 (TATOLI )–Ministru Interiór, Francisco da Costa Guterres, hateten, membru Polísia ho deviza Komisáriu Asistente balun la asume kargu iha Komandu Jerál tanba kestaun idade ne’ebé mak balun besik ona reforma, tanba ne’e Komandu deside la fó posizaun.
“Sira balun ne’ebé iha ona pozisaun reforma, besik ona atu tama reforma, entaun preparativu ona ne’e mak komandu prepara para sira atu tama ona ba reforma,” Ministru Interiór hato’o ba Jornalista sira iha sala Ministériu Interiór, Kinta ne’e.
Komisáriu Asistente Polísia hamutuk na’in-17 promovidu iha loron 27 Marsu 2026, kompostu husi Komisariu Asistente Polísia Afonso dos Santos ne’ebé daudaun nu’udar Komandante Jerál Polísia nasionál Timor-Leste (PNTL), Komisária Asistente Polísia Natercia Eufrasia Soares Martins nu’udar Segundu Komandante Jerál PNTL, Komisáriu Asistente Polísia Hermenegildo Gonçalves da Cruz nu’udar Inspetór Jerál PNTL, no Komisáriu Asistente Polísia Armando Monteiro nu’udar Komandante Komandu Operasaun PNTL.
Nune’e mós, Komisáriu Asistente Polísia Arquimino Ramos Agora asume kargu nu’udar Komandante Komandu Administrasaun PNTL, Komisáriu Asistente Polísia José Soares agora asume kargu Komandante Komandu Pesoál no Formasaun PNTL, Komisáriu Asistente Polísia Orlando Gomes daudaun asume kargu nu’udar Komandante PNTL Munisípiu Dili.
Komisáriu Asistente Polísia Agostinho Gome daudaun hanesan Komandante Unidade Espesiál Polísia, Komisáriu Asistente Polísia Justinho Menezes daudaun Apoiu Servisu iha Inspetór Jerál, Komisáriu Asistente Polísia António de Sá daudaun nu’udar Adidu Seguransa iha Malázia, Komisáriu Asistente Polísia Jorge Monteiro nu’udar Diretór Ezekutivu Servisu Migrasaun.
Notísia relevante : Governu prepara rejime remuneratóriu regula vensimentu membru PNTL promovidu
Komisáriu Asistente Polísia José Maria Neto Mok daudaun Adidu Seguransa iha Portugal, Komisáriu Asistente Polísia Carlos Jerónimo nu’udar Adidu Seguransa iha Austrália.
Komisáriu Asistente Polísia Arnaldo de Araújo la okupa pozisaun ruma, Komisáriu Asistente Polísia Octávio Bucar laiha posizaun iha Komandu Jerál, Komisáriu Asistente Polísia Mateus A. Mendes daudaun ne’e la okupa pozisaun ruma iha Komandu Jerál, Komisáriu Asistente Polísia Antoninho Mauluta la okupa pozisaun ruma iha Komandu Jerál.
Iha sorin seluk, Governante ne’e ladún lembra dirijente PNTL ho deviza Komisáriu Asistente Polísia na’in hira mak daudaun ne’e la okupa pozisaun ruma iha Komandu Jerál no Ministériu Interiór.
Nia dehan, direjente sira ne’ebé mak daudaun ne’e la okupa pozisaun ruma iha Komandu Jerál no Ministeriu Interiór sei tama lista reforma tinan oin.
“Ha’u ladún hatene sira númeru ezatu, mas sei publika sira-nia naran ne’e iha Novembru atu reforma ba tinan oin ne’e,” nia afirma.
Ministru hatutan, tanba balun kestaun saúde, tanba ne’e deside sei deskansa ona maibé ein prinsípiu tenta atu koloka sira hotu kedas.
“Balun mak seidauk tanba ita haree tok, tanba sira (dirijente PNTL) hakerek karta mai katak kestaun saúde, entaun ita haruka sira deskansa, maibé Komandu sei koloka tuir hotu sira tuir pozisaun ne’ebé iha,” nia tenik.
Jornalista : Natalino Costa
Editora : Julia Chatarina
