DILI, 05 Maiu 2025 (TATOLI)—Prezidente Komisaun Diviza Tranzitória Polísia Nasionál Timor-Leste (PNTL), Paulo de Assis Belo, hateten Governu prepara rejime remuneratóriu hodi regula vensimentu membru PNTL ne’ebé hetan Promosaun Tranzitória iha tinan ne’e.
Nia dehan, iha preokupasaun balun mosu kona-ba saláriu katak depoizde promosaun tranzitória ne’e sira-nia saláriu laiha mudansa.
“Governu prepara prepara tiha ona buat ida bolu dehan Rejime Remuneratóriu. Rejime Remuneratóriu ne’e foun. Rejime ida-ne’e atu regula membru polísia sira-ne’ebé foin daudaun hetan promosaun diviza,” Paulo hateten ba jornalista sira hafoin partisipa serimónia promosaun diviza tranzitória ba membru PNTL 400-resin ne’ebé hala’o iha Kuartél Jerál PNTL, Kaikoli, Dili, segunda ne’e.
Nia dehan, rejime remuneratóriu ne’e preparadu, agora iha ona meza Ministru Interiór, hein atu lori bá Konsellu Ministru atu diskute.
Notísia relevante: Governu define regra promosaun tranzitória ba membru PNTL 2.700-resin
Paulo Assis esplika, rejime remuneratóriu foun ne’e sei muda saláriu no regalia ba membru polísia sira-ne’ebé foin daudaun hetan ona promosaun tranzitória tuir idak-idak nia diviza.
Nia tenik, rejime remuneratóriu ne’e prevalese ba hotu-hotu, tantu ba Ajente, Inspetór Asitente no husi Inspetór Asistente ba to’o Superintendente Asistente.
Jornalista: Natalino Costa
Editór: Xisto Freitas da Piedade
