DILI, 24 Juñu 2026 (TATOLI)—Sekretária Estadu Formasaun Profisionál no Empregu (SEFOPE) asina kontratu ho grupu empregu temporária 31 no auto empregu 40 hamutuk 71 husi munisípiu 14 ho objetivu atu kria empregu iha rai-laran.
Sekretáriu Estadu Formasaun Profisionál no Empregu, Rogério Araújo Mendonça, hateten objetivu hamutuk iha fatin ne’e atu asina kontratu ho grupu benefisiáriu sira husi programa empregu temporária (rurál) hamutuk 31 ho orsamentu hamutuk $92.450,00 no auto Empregu hamutuk 40 ho orsamentu hamutuk $105.046,00.
“Grupu 71 ne’e, ita-boot sira hetan ne’ebé di’ak tanba husi selesaun lubuk husi ita-boot sira-nia proposta ne’ebé submete mai iha SEFOPE,” Sekretariu Estadu ne’e informa ba jornalista sira iha salaun katedral, Villa Verde, ohin.
Governante ne’e dehan, kona-ba programa auto empregu ida-ne’e polítika husi Governu nian hodi apoiu grupu auto empregu no empregu temporáriu ho objetivu kria empregu no diversifikasaun ekonomia iha rai-laran.
Aleinde ne’e, nia dehan, haruka traballadór sira ba servisu iha rai-li’ur ne’e meiu ida husi diversifikasaun ekonomia hodi tulun nesesidade família, sosiedade no grupu rasik.
“Ha’u hatene katak ita boot sira-ne’ebé iha fatin ida-ne’e iha ona esperiensia, tanba kritéria ne’ebé iha mak ita-boot sira tenke iha estabelesimentu rasik, rekursu umanu, ekipamentu mínimu 25%, Governu sei apoiu hodi reforsa tan ita-boot sira-nia negósiu,” nia dehan.
Tamba ne’e, nia apela ba benefisiáriu sira atu iha responsabilidade ba fundu ne’ebé Governu atribui ba implementa tuir ema ida-idak nia tipu negósiu tanba programa ne’e sei iha monitorizasaun husi SEFOPE inklui Komisaun Antí Korrupsaun (KAK).
“Investe halo di’ak ita-boot sira-nia negósiu tanba liuhusi programa ne’e benefisiáriu lubuk ida mak susesu iha rasik kompañia no balun sai suplayer,” nia informa.
Benefisiáriu husi grupu auto empregu Fernando Martins 62 SAMIS, Fernando Martins, hateten nia parte sente kontente tamba Governu nafatin fó oportunidade ba nia atu eleva tan ninia grupu negósiu ida-ne’e.
“Ami-nia grupu ne’e tipu negósiu artezenatu nian. Grupu ne’e harii dezde 2015 to’o agora no ninia rekursu umanu hamutuk ema na’in-lima. Sasán ne’ebé ami prodús baibain lori mai faan iha feira nasionál sira. Rendimentu ne’ebe iha, ami uza hodi sosa tan materiál sira hodi uza ba produtu artezenatu nian,” nia relata.
Nia komprometidu sei uza rensponsabilidade ne’e ho di’ak atu nune’e bele eleva tan sira-nia grupu no kria empregu ba ema seluk iha Maubisse.
“Ha’u mós husu ba maluk defisiensia sira no joven sira atu labele lakon vontade hodi espresa ita-nia kriatividade no hatudu liuhusi artezenatu. Tanba maske ha’u nu’udar ema ho defisiénsia ida maibé ha’u iha mehi boot atu sai susesu ba ha’u-nia família,” nia hateten.
Enkuantu grupu empregu temporária hamutuk 31 mak hanesan Grupu Sai Atan Antes Susesu ho tipu negósiu kuda buah naga, RENAL ho tipu negósiu kuda Cengkeh, G FOHKIT ho tipu negósiu kuda ainanas, Lerolisa Dameho tipu negósiu kuda hudi, KBFH ho tipu negósiu kuda kafe.
Grupu empregu Hadomi Natureza ho tipu negósiu hamoos estrada, DOHELA ho tipu negósiu kuda kafe, GJLHN ho tipu negosiu kuda sabraka, Fundasaun Katilosa ho tipu negósiu kuda ai-mahoni, Baha Uaque ho tipu negósiu kuda buah naga, grupu Kuda Ai-horis ho tipu negósiu no kuda hudi, Juventude Opi-Op ho tipu negósiu kuda kami’i.
Grupu kuda ai-oan ho tipu negósiu kuda sabraka, Todo ho tipu negósiu kuda ainanas, Jovlac ho tipu negósiu kuda sabraka, Tasi Tehem Suai Loroho tipu negósiu kuda ainanas, Mão de Obra ho tipu negósiu hadia estrada, Juventude Badinas ho tipu negósiu kudaI, Hadomi Ai-horis ho tipu negosiu kuda hudi, Looro ho tipu negósiu kuda sabraka, Grupu Kuda Ai-Oan Ave ho tipu negósiu kuda kafe.
Grupu Railuli Ghafer ho tipu negósiu kuda sabraka, Foho-Balibar ho tipu negósiu kuda kafe, Komunidade Uniaun Agrikultura Kulau ho tipu negósiu kuda hudi, Haslaran ho tipu negósiu kuda rambutan, Konvertido ho tipu negósiu kuda hudi, Alas ho tipu negósiu kuda kafe, Bukhaen ho tipu negósiu kuda hudi, Kisan ho tipu negósiu kuda hudi, Bi’eno ho tipu negósiu kuda ainanas, no grupu kuda ai-oan ho tipu negósiu kuda baunila.
Enkuantu iha grupu auto empregu hamutuk 40 ne’e ho tipu negósiu ortikultura, ofisina motor no karreta, guest house, bordir, artezenatu, karpintária, rental fotocopy, kafetária, restaurante, prodús batako, alfaeati, salon, haki’ak ikan nila, prodús tua, prodús tempe no tahu, prodúz mina kamii no soru tais.
Jornalista : Alexandra da Costa
Editór : Cancio Ximenes
