VIKEKE, 26 Juñu 2026 (TATOLI)–Maski serimónia fúnebre Antigu Prezidente Repúblika (PR), Francisco Guterres ‘Lú Olo’ hala’o iha Jardín Eroi Metinaru, Munisípiu Díli, maibé autordade, veteranu no komunidade iha Postu Administrativu Uatukarbau, Munisípiu Vikeke, lori ai-funan no sunu lilin ba semitériu públiku hodi presta omenajen ikus ba saudozu ne’e.
Autoridade Postu administrativu Uatukarbau, Anacleto D. Sarmento, hateten distánsia ne’ebé dook nune’e ema barak labele partisipa Saudozu PR Lú Olo nia serimónia fúnebre iha Dili, tanba ne’e autoridade, veteranu no populasaun sira iha Postu Uatukarbau deside realiza presta omenajen iha Postu Uatukarabu de’it.
“Ho distánasi ne’ebé dook populasaun labele ba partisipa iha Dili, entaun ami komesa horisehik lori ai-funan no lilin ba igreja hodi husu misa ba ita-nia Eroi Lú Olo,” Anacleto ba TATOLI iha Postu Uatukarbau, Sesta ne’e.
Nia hatutan, hafoin misa, kalan autoridade, veteranu no populasaun kontinua hadeer ai-funan.
“Ami la’o ain husi postu ba semitériu públiku iha Suku Uaniuma, hodi kari ai-funan no lilin iha krúz boot, atu ami bele hato’o ami-niaa omenajen ikus ba ita-nia eroi ne’e,” nia haktuir.
Anacleto informa katak atividade ne’e realiza tanba ho sentimentu ne’ebé boot ba Saudozu Lú Olo ne’ebé lakon iha povu nia leet. Autoridade, veteranu no populasaun sira iha postu Uatukarbau inisiativa reliza atividade refeidu.
“Ami sente triste tanba lakon líder simples ida-ne’e,” autoridade ne’e hateten.
Tuir obserbasaun TATOLI katak iha serimónia kari ai-funan no lilin iha semitériu ne’e, povu maioria mak partisipa, maski la’o ho distánsia ne’ebé besik kilómetru ida. Atividade ne’e hetan seguransa husi Polísia Nasionál Timor Leste (PNTL) Eskuadra Uatukarbau.
Entretantu, partisipa iha serimónia kari ai-funan no lilin ne’e kompostu husi autoridade lokál, funsionáriu Servisu Saúde Uatukarbau, profesór, estudante, veteranu no populasaun.
Jornalista: Vitorino Lopes da Costa
Editór: Xisto Freitas da Piedade
