Semana oin, Komisaun Rekrutamentu hahú re-teste aplikante 12.000-resin membru foun PNTL

DILI, 18 Juñu 2026 (TATOLI )—Komisaun Rekrutamentu sei hahú re-teste ba aplikante vaga membru foun Polísia Nasionál Timor-Leste (PNTL) iha semana oin.

Ministru Interiór, Francisco da Costa Guterres, hateten, komisaun sei halo verifikasaun ba dadus aplikante 12.000-resin ne’ebé antes ne’e kokorre ona iha rekrutamentu membru foun PNTL foun tinan 2025.

“Data fiksu ne’e semana oin sira (komisaun) komesa halo serbisu ona. Servisu verifikasaun ba dadus sira. Verifikasaun dadus ne’e sira halo iha semana rua hotu, kompleta hotu tiha sira públika ona naran sira ne’ebé tuir teste para depois fó tempu ba komisaun para públika kalendáriu ba teste,” Ministru Interiór, Francisco da Costa Guterres, relata ba Jornalista sira iha sala Ministeriu Interiór, Kinta ne’e.

Governante ne’e dehan, juri rekrutamentu sei uza faze teste haat no sistema eleminatóriu  iha prosesu resteste ne’e.

Faze ida mak verifikasaun dadus konkorrente sira, bainhira konkorrente sira la liu iha faze selesaun dokumentu maka automátikamente eleminadu ona, maibé kuandu liu mak sei pasa ba teste prova kulturál, kuandu pasa maka faze tuir mai halo teste psikolojia, kuandu la pasa mak sei elemina maibé karik pasa sei hakat ba teste saúde.

“Primeiru sira halo verifikasaun dokumentu sira ne’ebé la priense rekezitus hela, haree tok sira-nia dokumentu ne’e,” nia katak.

Faze daruak, haree ona ba teste, sé nia dokumentu kompletu nia bá ona teste

Enkuantu, faze tolu ne’e mak hanesan prova kulturál depois mai teste psikolojia ka psikotest no ida fali teste saúde, ne’ebé mak hela iha teste prova kulturál nia hela ona.

“Ita mantein dadus anteriór, depois sira sae ba mak ida-ne’ebé hela kontinua hela, ida-ne’ebé hela fali iha psikotest ka teste pisikolojia nia hela ona. Ikus liu grupu ne’ebé liu ne’e mak ba liu ona teste saúde, mak hela tan balun ne’e testu tama. Ne’e ita aplika eleminátoriu hotu kedan,” nia hato’o.

Notísia relevante : Komisaun Rekrutamentu PNTL rejista aplikante na’in-400 hato’o rekursu ba MI

Kritériu idade ne’e laiha mudansa husi 18 to’o 23. Bainhira konkorrente sira ne’e tuir teste, kuandu númeru ida-ne’ebé mak liu iha faze ida. Momentu ne’ebá kedan komisaun anúnsia kedan no sei anúnsia fali kona-ba kalendáriu teste psikolojia.

“Teste ne’e liu loron ida ka rua komisaun fó sai kedan rezultadu, ne’ebé ema ne’ebé mak nia valór la priense, nia mak hela liu iha teste sira ne’e,” nia afirma.

Governante ne’e espera iha Fulan-Agustu prosesu rekrutamentu ba membru foun PNTL bele konklui, iha Setembru konkorrente sira tama ona iha Sentru Formasaun Polísia, iha Fevereiru 2027 hahú finaliza kursu no koloka ona sira hodi hahú halo Polísia nia serbisu hodi reforsa instituisaun.

Orsamentu ba rekrutamentu ne’e iha aumenta oituan husi millaun $1 ba millaun $1-resin.

“Orsamentu ba ida-ne’e tanba ita aumenta tan númeru, entaun ita tenke aumenta farda, entaun ita aumenta tan osan ita gasta tan millaun $1-resin,” nia katak.

Parte seluk, Ministru garante prosesu rekrutamentu vaga membru PNTL foun sei la’o ho transparante.

Ministériu Interór hasai ona diploma ministeriál ba rekrutamentu membru foun PNTL no parte komisaun sei implementa.

Antes ne’e, Ministériu Interiór iha planu atu implementa rekrutamentu ne’e iha Maiu, maibé tanba proposta husi PNTL husu atu aumenta tan númeru vaga rekrutamentu husi 400 aumenta tan 350, nune’e tenke lori ba Konsellu Ministru atu hetan aprovasaun.

“Agora ami halo ona nia prosedimentu, semana oin entrega ona, juri sira komesa serbisu,” nia katak.

Xefe ba Juri Komisaun Rekrutamentu membru foun PNTL ne’e lideradu Komisáriu Asistente Polísia, José Soares no Superintendente Xefe Polísia, Ismael Babo.

“Husi Ministeriu Interiór la tama, juri ne’e husi PNTL na’in-rua mak hanesan Komandante José no Komandante Babo. Ne’e sira depois husi Polísia Federál na’in-rua husi GNR na’in-rua ho tan funsaun públiku ida,” nia tenik.

Ministru garante prosesu sira ne’e sei lao transparante no imparsiál.

“Ha’u hanoin di’ak ona, tanba sei harii mós kontinua harii nafatin komisaun monitorizasaun no fiskalizaun, komisaun ida ne’e ita hili ema sira ne’ebé iha esperiénsia para mai haree tuir nafatin”, nia dehan.

Ministru Francisco mós sei kontinua nafatin envolve komisaun monitorizasaun no fiskalizaun, hodi monitoriza rekrutamentu vaga PNTL ne’e.

“Sira ne’ebé mak foin lalais ajuda ita loke sai problema ita sei hili filafali tama iha laran atu kontinua sira-nia serbisu haree tuir nafatin atu buat ne’ebé mak sira halo ne’e tenke tuir regra no transparante,” nia katak.

Jornalista     : Natalino Costa

Editora          : Julia Chatarina