DILI, 28 Juñu 2026 (TATOLI) – Selesaun Repúblika Demokrátika Kongo (RD Kongo) konsege duni garante sira-nia billete ba jornada 32 (Oitavu Finál) Kopa Mundiál 2026, hafoin halo reviravolta furak hodi halakon Uzbekistan ho eskoru finál 3-1. Jogu ne’ebé realiza iha Estádiu Atlanta, Georgia, Estadu Unidu Amêrika (EUA) iha Domingu dader (oras Timor-Leste), lori mós konsekuénsia boot ba ekipa seluk.
Vitória dramátiku ne’e la’ós de’it hodi foti RD Kongo ba oitavu finál nu’udar ekipa terseiru lugar di’ak liu husi Grupu K ho pontu haat (4), maibé mós dudu sai Koreia-Súl husi pozisaun ‘top ualu’ (terseiru lugar di’ak liu). Rezultadu ne’e obriga Kapitaun Son Heung-min ho nia kolega sira atu arruma mala hodi fila sedu ba uma.
Reviravolta iha segunda parte
Bainhira apitu inisiál rona, RD Kongo hatene katak sira laiha opsaun seluk fali la’ós de’it “tenke manán” hodi asegura fatin iha faze eliminatória. Maibé, mehi ne’e kuaze naksobu bainhira jogu foin la’o minutu 10.
Avansadu Uzbekistan, Eldor Shomurodov, lansa bola naruk (long ball) ne’ebé kusta tebes hodi halo guarda-rede RD Kongo, Lionel Mpasi-Nzau, hakfodak no lakon pozisaun. Uzbekistan lori vantajen 1-0.
RD Kongo reaze kedas. Iha minutu 18, Nathanael Mbuku konsege hatama bola ba rede, maibé haksolok ne’e provizóriu de’it. Árbitru Felix Zwayer anula golu ne’e hafoin halo verifikasaun liuhusi Video Assistant Referee (VAR). Maski domina atake no nafatin puxa liña defeza adversáriu nian, RD Kongo labele silu eskoru to’o tempu deskansu (0-1).
Wissa no Mayele sai erói
Iha parte daruak, eskerdra afrikana ne’e hatudu duni sira-nia kbiit no determinasaun. Presaun ne’ebé beik-beik ikusmai lori duni rezultadu:
- Minutu 68 (1-1): Defeza Uzbekistan, Abdukodir Khusanov, halo falta grave iha área minik nian. Yoane Wissa ne’ebé simu responsabilidade nu’udar ezekutór, suta metin penalidade hodi halo empata 1-1.
- Minutu 78 (2-1): Dominiu RD Kongo nian mós sai kail pálpavel. Fiston Mayele halo suta kapás (tap-in) ne’ebé xoke loos guarda-rede Abduvohid Nematov, hodi lori RD Kongo ba ohan.
- Minutu 90+1 (3-1): Atu taka odamatan ba reasaun fali husi Uzbekistan, Meschack Elia fó pasajen kmanek ida ne’ebé tesi hosi Yoane Wissa hodi marka ninia golu daruak, sekaligus duni Uzbekistan ba uma no taka jogu ho vitória kmanek 3-1.
Alineasaun jogadór sira
DR Kongo: Lionel Mpasi-Nzau; Aaron Wan-Bissaka, Chancel Mbemba, Axel Tuanzebe, Arthur Masuaku; Nathanaël Mbuku, Noah Sadiki, Samuel Moutoussamy, Brian Cipenga; Cédric Bakambu, Yoane Wissa. Treinadór: Fábio Cannavaro
Uzbekistan: Abduvohid Nematov; Abdukodir Khusanov, Jakhongir Urozov, Rustamjon Ashurmatov, Khoziakbar Alidzhanov, Sherzod Nasrulloev; Dostonbek Khamdamov, Akmal Mozgovoy, Otabek Shukurov, Abbosbek Fayzullayev; Eldor Shomurodov.
Jornalista: Hortêncio Sanchez
Editór: Rafael Ximenes de A. Belo
