DILI, 28 Juñu 2026 (TATOLI) – Iha kompetisaun ne’ebé impresionante no dramátiku, ne’ebé nu’udar parte ida husi jogu primeira divizaun liga timorense 2026, Klube AD.SLB halakon DIT FC ho eskór 2-0, iha duelo ne’ebé nia intensidade no místiku futeból kativa ka hakesi adeptu sira to’o últimu segundu jogu nian.
Bainhira apitu lian hahú, ekipa rua iha kampu, idaidak ho ambisaun, uza téknika, tátika, no estratéjia, hakarak domina jogu no fura guarda-rede adversáriu.
Iha primeira-parte, jogu hahú kedas ho performe no kompetisaun maka’as, ho kompromisu domina bola iha kampu laran husi ekipa rua ne’e. Maibé, efisiénsia ramata nian menus iha minutu 45 dahuluk. Ekipa rua la konsege domina malu ka ekilibru iha kampu. Empata.
Iha segunda parte, istória jogu nian hahú nakloke orientasaun épika sira ho esforsu oioin. Ekipa rua ne’e intensifika sira-nia tranzisaun ofensiva, hodi buka vantajen ba hatama golu. Duelo entre ekipa adversária rua, rezultadu; AD.SLB sobu ‘parede’ DIT FC nian sai rahun iha minutu 78 husi Jogadór estrela Italo Soares (númeru 28), ho jenuína. Nune’e, adeptu sira iha tribuna hakilar ho ksolok asiste rezultadu ne’e.
Hahú husi ne’e ponteiru relójiu kontinua la’o rumu ka hakat ba jogu finál, ho intensidade dramátika:
- 90+minutu 4: Drama akontese iha área penalidade DIT FC nian. Iha jogu ida-ne’ebé perigozu tebes, Pedro Fernandes komete falta ne’ebé grave direita iha área penalidade nian. Árbitru la duvida: nia hatudu kartaun mean ba jogadór DIT FC no fó penalidade ne’ebé korresponde, hodi husik nia ekipa ho ema na’in-10 ba restu jogu nian.
- 90+12 Minutu: Bainhira jogu besik atu ramata, oportunidade ‘osan-mean’ ida, monu dala ida tan ba jogadór estranjeiru Italo Soares. Nune’e, ho desizivu no rigór, avansadu ne’e, fura guarda-redes DIT FC ba dala-rua, no rezultadu nakfila husi 1-0 sai 2 – 0 to’o jogu ramata.
PRRrrrr. Apitu finál lian. Vitória, definitivamente, pertense ba AD.SLB. No, husi rezultadu finál ne’e, AD.SLB konsege rekolla ona pontus hamutuk 10 no DIT FC mantein ho pontu tolu (3) iha tabela klasifikasaun.
Jornalista: Alexandra da Costa
Editór: Rafael Ximenes de A. Belo
