VIKEKE, 29 Juñu 2026 (TATOLI)—Autoridade Munisípiu Vikeke liuhusi Diresaun Organizasaun Apoia Sosiedade Sivíl oferese kapasitasaun kona-ba responsablidade no utilizasaun ekipamentu suku sira, ofisiál suku ne’ebé destaka iha suku 38 iha Munisípiu Vikeke.
Iha abertura formasaun ne’e, Prezidente Autoridade Munisípiu Vikeke, Francisco C. S. de Gonzaga Soares, haktuir formasaun ba ofisiál suku sira atu fó hanoin fali ba funsionáriu suku hodi hasa’e sira-nia koñesimentu kona-ba atendimentu komunidade iha suku idaidak.
“Tan ne’e, ha’u sente formasaun ba ita-nia ofisiál sira-ne’e importante tebes tanba ofisiál suku sira mak besik liubá ita-nia populasaun. Tanba ne’e, liuhusi formasaun sira-ne’e ofisiál sira bele servi ita-nia povu ho di’ak,” Francisco hateten iha abertura formasaun iha salaun STAE, Vikeke Vila, Segunda ne’e.
Autoridade Munisípiu Vikeke ne’e fó hanoin katak ofisiál suku sira sai hanesan liña frente ida-ne’ebé munisípiu destaka iha kada suku iha Munisípiu Vikeke.
Aleinde ne’e, nia husu ofisiál suku sira tenke uitliza motorizada ne’ebé autoridade munisípiu entrega ona ba suku sira uza ba asuntu servisu no labele uza fali ba asuntu privadu sira seluk.
Iha fatin hansan, Diretór Servisu Munisipál Asuntu Organizasaun Naun Governamentál no Organizasaun Komunitária, Cosme Sarmento, hateten objetivu husi formasaun ne’e atu haforsa liután ofisiál suku sira tanba dalaruma diresaun servisu munisipál asuntu organizasaun naun govermentál no organizasaun komuitáriu tun bá suku la hetan ofisiál sira.
“Ami realiza formasaun ida-ne’e oinsá ita bele orienta malu halo servisu, tanba ne’e formasaun ne’e ba sekretáriu suku no ofisiál sosiál suku sira,” nia informa.
Entretantu, abertura formasaun ne’e partisipa husi diretór servisu munisipál, autoridade lokál no funsionáriu suku hamutuk na’in-72. Formasaun ne’e durante loron rua hahú (29-30 Juñu 2026).
Jornalista: Vitorino Lopes da Costa
Editór: Xisto Freitas da Piedade
