VIKEKE, 30 Juñu 2026 (TATOLI)—Koordenadór Grupu Marada husi Suku Nahareka, Postu Administrativu Ossú, Munisípiu Vikeke, Cosme Soares Tilman, informa Fundasaun Knua Haberan Komunidade (F-KHK) apoia mákina produsaun mina-nuu nian ba Grupu Marada hodi prodús mina iha Suku Nahareka.
“Foin lalais ami simu ekipamentu kona-ba produsaun mina-nuu ne’ebé kompostu husi mákina dulas nuu ida no mákina presaun nuu ida ba ami-nia grupu, atu fasilita ami prodús mina sona,” Cosme ba TATOLI iha Postu Vikeke Vila, Tersa ne’e.
Koodenadór grupu ne’e hatatuan apoia ekipamentu produsaun mina-nuu nian ne’e bele ajuda membru grupu sira hodi prodús mina-sona tanba iha Suku Nahareka nuu iha maibé menus ekipamentu, entaun komunidade labele halo produsaun.
“Nune’e, liuhusi ekipamentu sira-ne’e bele tulun ona ami-nia grupu halo prosesamentu ne’ebé eskala ki’ik, maibé ami koko prodús. Ekipamentu ne’e, entrega ona ba ami no ami koko ona halo produsaun dala rua. Primeiru, ami hetan litru neen no produsaun daruak litru hitu (7). Husi rezultadu ne’e ami seiduak fa’an. Ami entrega ba F-KHK hodi halo teste mina nia kualidade. Karik kualidade di’ak hafoin ami halo produsaun,” Cosme haktuir.
Nia dehan liuhusi ekipamentu sira-ne’e bele hadi’a membru grupu sira-nia moris no mós bele responde nesesidade merkadu.
“Ami-nia esperansa mak hadi’a ekonomia família mak liuhusi atividade produsaun mina-nuu. Aban bainrua ami halo produsaun mak rezultadu iha balun ami rai no balun sei fahe ba membru sira hodi fa’an. Ami iha membru totál hamutuk 24,” Cosme tenik.
Jornalista: Vitorino Lopes da Costa
Editór: Xisto Freitas da Piedade
