DILI, 30 Juñu 2026 (TATOLI)—Reitór Universidade Nasionál Timor Lorosa’e (UNTL), Joviano António da Costa, afirma situasaun ne’ebé akontese iha Fakuldade Edukasaun Arte Umanidade (FEAH-sigla portugeza), daudaun iha prosesu atu buka solusaun.
“Ha’u rona katak iha kobransa ilegál no buat barak tan, maibe ida-ne’e iha departementu laran, entaun tuir ha’u-nia haree ida-ne’e hanesan bikan no kanuru mak tarutu iha uma laran. La’ós kestaun boot,” reitór dehan ba jornalista sira iha Sentru Konvensaun Dili, Tersa ne’e.
Maibé, nia parte orienta ona dekanu no kargu xefia sira hamutuk atu buka solusaun ba problema referidu.
“Se problema iha ita tuur hamutuk ko’alia hodi buka solusaun. Tanba ne’e, dalan di’akliu mak tuur hamutuk buka solusaun no lori parte rua hamutuk atu rezolve. Ne’e duni, ha’u husu ba sira, se hakarak lori sai problema ne’e ba li’ur, tenke responsabiliza,” nia hateten.
Notísia relevante: Estudante sira dezafia Reitór UNTL toma problema ne’ebé akontese iha FEAH
Maski nune’e, estudante sira husi FEAH kontinua halo greve iha loron daruak hodi protesta hasoru alegasaun kobransa ilegál no manipulasaun nota estudante sira-nian ne’ebé akontese iha Departamentu Ensinu Lian Tetun no Departamentu Ensinu Fízika.
Portavóz Asaun Protesta, Eusebio Soares Tilman, dehan greve ne’e realiza tanba estudante sira konsidera katak to’o agora seidauk iha solusaun ba problema sira-ne’ebé sira hato’o.
Tuir nia, molok halo greve, estudante vítima sira hato’o sira-nia preokupasaun uluk ba Asosiasaun Akadémika, depoiz asosiasaun no vítima sira buka halo diálogu ho parte ne’ebé sira akuza, maibé dehan la hetan resposta satisfatória. Tanba ne’e, sira deside lori kazu ne’e ba públiku.
Relasiona ho alegasaun hasoru profesóra AAT, estudante sira aprezenta dokumentu ida datadu 23 Novembru 2017, ne’ebé asina husi xefe turma sira no xefe Asosiasaun Estudante Departamentu Dalen Tetun.
Iha dokumentu ne’e, estudante sira hato’o keixa kona-ba alegasaun atrazu entrega valór, obrigasaun estudante sira atu kontribui osan atu sosa livru maibé livru la entrega, no alegasaun kona-ba falta prezensa dosente nian iha aula.
Dokumentu referidu mós rekomenda atu dosente responsabiliza ba osan ne’ebé estudante sira kontribui no husu lideransa fakuldade atu hola medida disiplinár tuir regulamentu UNTL.
Aleinde me’e, Auxiliadora de Santa Rosa, nu’udár Estudante Departamentu Ensinu Lian Tetun, dehan nia rasik sai vítima ba alegasaun kobransa ilegal iha tinan 2022.
“Obriga ami entrega $4 ba kada estudante ho razaun atu halo festa habelun malu entre turma sira. Maibé, festa ne’e la akontese no to’o agora osan ne’e seidauk devolve. Ami levanta kazu ida-ne’e atu jerasaun tuirmai la hasoru problema hanesan ne’e,” Auxiliadora informa.
Nia hateten tan katak estudante sira husu atu prosesu devolusaun osan no investigasaun hala’o liuhusi Konsellu Disiplinár, la’ós liuhusi entendimentu pesoál.
Iha parte seluk, estudante Departamentu Ensinu Fízika, Emeliano Madeira, alega katak manipulasaun valór estudante sira nian afeta diretamente ba prosesu estájiu.
“Tuir valór ne’ebé ami simu durante semestre, estudante balun hetan valór di’ak, maibé bainhira sai rezultadu ikus iha administrasaun, valór balun muda husi B bá fali C, no ida-ne’e afeta estudante barak atu labele tuir estájiu,” Emeliano haktuir.
Asosiasaun Akadémika FEAH mós husu ba Magnífiku Reitór UNTL atu loke Komisaun Instrusaun Konsellu Disiplinár hodi halo investigasaun ba alegasaun manipulasaun nota estudante sira no rezolve kazu referidu tuir nórma no regulamentu universidade nian.
Jornalista: Osória Marques
Editór: Xisto Freitas da Piedade
