DILI, 30 Juñu 2026 (TATOLI)-Reprezentante povu iha Parlamentu Nasionál husu ba Governu atu normaliza lalais infraestrutura sira, liuliu estrada ne’ebé hetan danu husi dezastre naturál iha semana kotuk, atu garante movimentu populasaun no asesu bá servisu báziku la interrompe.
Deputada husi bankada Partidu Demokrátiku (PD), Maria Teresa Gusmão, levanta preokupasaun ne’e hafoin halo kontaktu eleitorál iha baze. Nia dehan katak estrada iha Haekoni, aldeia Mota Basaruai, postu administrativu Baguia, munisípiu Baukau, kotu no naksobu totál tanba udan-boot.
Tuir nia, danu ne’e difikulta populasaun nia movimentu, inklui ambulánsia labele asesu ba komunidade. “Nune’e, ambulánsia para de’it iha estrada sorin no família husi suku Osohuna no Afaloikai hulan mate-isin la’o ain de’it to’o mate uma ne’ebé dook”, nia levanta iha reuniaun plenária Parlamentu, ohin.
Maria Teresa dehan daudaun populasaun husi suku rua ne’e labele lori sasán todan no barak bá no mai tanba estrada kotu totál
Iha intervensaun hanesan, deputadu husi bankada Kongresu Nasionál Rekonstrusaun Timorense (CNRT, sigla portugés), Virgílio Pereira, reforsa katak estrada ne’e kotu duni no suku rua ne’e ona laiha ligasaun. Nune’e, presiza halo intervensaun urjente tanba daudaun ne’e motorizada de’it labele liu.
Iha sorin seluk deputadu PD, Armando Lopes, mós hato’o katak rai-monu taka estrada ida parte diresaun suku Debos, aldeia Bonuk Holibeldes no aldeia Hoba Labarai, postu administrativu Suai.
Nia husu atu normaliza lalais tanba estrada ne’e importante ba estudante no povu sira asesu bá edukasaun, saúde, sosiál, ekonomia no seguransa.
Deputadu husi bankada Frente Revolusionária Timor-Leste Indepedente (FRETILIN), David Dias Ximenes Mandati, levanta katak estrada monu iha Aitutu-Ainaru mós presiza normaliza tanba la’e fó risku ba movimentu transporte públiku.
Deputada CNRT, Maria Gorumali Barreto, mós foti kestaun estrada iha parte Atabae, liuliu antes tama bá fatin koñesidu fa’an katupa iha kurva oan afeta husi udan boot no halo rai-monu taka estrada, to’o agora seidauk normaliza.
“Tanba, situasaun rai taka estrada ne’e iha kurva, entaun bele afeta asidente, presiza normaliza lalais”, dehan.
Jornalista: Nelson de Sousa
Editora: Maria Auxiliadora
