BAUKAU, 01 Jullu 2026 (TATOLI)–Inséndiu iha Suku Uailili, Postu Administrativu Baukau Vila, Munisípiu Baukau, rezulta uma ida hetan estragu totál.
Kazu referidu akontese iha Tersa, 30 Juñu madrugada kauza ahi ne’ebé lahamate hafoin vítima ho naran Luís Francisco idade 81 ramata te’in fahi nia hahán nune’e ahi alastra hodi han uma inklui sasán uma-laran la salva.
“Uma ahi han mutuk tiha tanba katuas mesak de’it entaun labele salva sasán sira maibé salva an de’it, enkuantu ita fó ona apoia emerjénsia,” Komandante Operasaun Autoridade Protesaun Sivíl (APC-sigla portugeza), Francisco Viana Freitas, hateten iha nia kna’ar fatin, Vila Antiga, Baukau, Kuarta ne’e.
Viana relata husi observasaun iha terrenu, APC Baukau rejista aleinde uma estragu totál, insèndiu referida rezulta ekipamentu uma hanesan roupa, materiál dapur, kulsaun, osan no seluk tan la salva, tanba kauza ahi lakan alastra maka’as.
Vitíma Luís Francisco rasik idade idozu iha-ne’ebé hela mesak no hela dook husi komunidade nune’e difísil atu evakua ekipamentu uma bainhira mosu inséndiu.
“Idozu nia uma ne’e uma tali. Uma mutuk ona. Agora hela iha família nia uma,” Viana haktuir.
Entretantu, APC Baukau hafoin ramata inséndiu, oferese imediata apoia emerjénsia ba vítima hanesan hahán no la’ós hahán no rekoilha ona dadus hodi relata ba nasionál hodi hein prosesu re-verifikasaun nune’e futuru bele hetan apoia matérial rekuperasaun.
Jornalista: Natalino Belo
Editór: Xisto Freitas da Piedade
