DILI, 02 Jullu 2026 (TATOLI) – Jogu entre Béljika no Senegal iha Kopa Mundiál 2026 hamosu drama ne’ebé estraordináriu tebes iha Estádiu Lumen Field, Seattle, kinta madrugada (oras Timor-Leste). Maski atraza uluk ho golu rua, ekipa Red Devils (Béljika) konsege hatudu reasaun boot hodi manán ho skor 3-2 liuhusi tempu adisionál.
Vitória mihis no dramátiku ne’e lori kedas Béljika semo ba jornada 16 (oitavu finál) hodi hasoru vensedór husi jogu entre Estadu Unidus Amérika no Bósnia-Herzegovina. Enkuantu, derrota ne’e hakotu kedan Senegal nia peregrinasaun iha kompetisaun tinan ne’e nian.
Senegal domina husi inísiu
Husi minutu dahuluk, Senegal aplika kedas presaun maka’as. Duo atake Sadio Mane no Ismaila Sarr fó problema beibeik ba defeza belga ne’ebé proteje hosi guarda-rede Thibaut Courtois.
- Minutu 14: Senegal hetan oportunidade osan-mean dahuluk bainhira Sarr suta kona poste hosi bola rebote iha baliza oin.
- Minutu 24 (Golu Senegal): Presaun Lions of Teranga nian fó rezultadu. Habib Diarra aproveita didi’ak bola rebote hafoin Sarr nia kabesa kona fali poste, hodi muda skor ba 1-0.
- Resposta Béljika: Kevin De Bruyne, Leandro Trossard, no Charles De Ketelaere tenta atu hatán, maibé guarda-rede Senegal, Mory Diaw, hatudu dezempeñu sólidu hodi mantein vantajen 1-0 to’o intervalu.
Reviravolta fantástika béljika nian
Iha segundu tempu, treinadór Béljika halo mudansa xave hodi hatama Romelu Lukaku hodi aumenta forsa atake nian. Maski nune’e, Senegal mak hatama fali golu.
- Minutu 51 (Golu Daruak Senegal): Ismaila Sarr simu pasajen naruk husi Moussa Niakhate no lansa suta meia-volei kail ne’ebé Courtois la konsege hapara. Skor sa’e ba 2-0.
- Minutu 86 (Béljika Hahú Luta): Falta minutu lima jogu regulamentár atu remata, Romelu Lukaku hamenus défisit ba 2-1 hafoin simu kruzamentu hosi Thomas Meunier, maski hetan serku hosi defeza Senegal.
- Minutu 89 (Golu Empate): Liutiha minutu tolu de’it, Youri Tielemans halo estádiu nakdoko bainhira aproveita kruzamentu Leandro Trossard ho kabesa hodi halo skor ba 2-2, no obriga jogu ne’e la’o ba tempu adisionál.
Drama penalidade VAR iha minutu ikus
Iha tempu adisionál, defeza Senegal halo substituisaun tolu hodi hatama Al Hadji Diouf, Nicolas Jackson, no Bara Ndiaye. Ekipa rua hatudu jogu agresivu no troka atake, maibé golu la mosu iha minutu 15 primeiru.
Drama boot mosu iha minutu 90+19. Defeza Senegal ida tenta atu hasai bola iha kaixa laran maibé nia ain kona fali Tielemans nian. Hafoin revizaun liuhusi VAR, árbitru Said Martinez foti desizaun hodi fó penalidade ba Béljika, maski hetan protestu maka’as husi jogadór Senegal sira.
Youri Tielemans ne’ebé simu responsabilidade nu’udar kapitaun, ho kalma boot suta bola ba kantu rede, hodi halo guarda-rede Mory Diaw la book an no garante vitória 3-2 ba Béljika. Iha tempu lezaun, suta livre husi Pape Matar Sarr kuase hanesan maibé sai de’it ba li’ur, no Béljika konfirma sira-nia vitória ho retornu ne’ebé épiku.
Aliñasaun Jogadór sira
Béljika:
Thibaut Courtois (PG); Timothy Castagne, Brandon Mechele, Arthur Theate, Maxim de Cuyper; Hans Vanaken, Youri Tielemans; Jeremy Doku, Kevin de Bruyne, Leandro Trossard; Charles de Ketelaere (Romelu Lukaku).
Senegal:
Mory Diaw (PG); Krepin Diatta, Pathe Ciss, Moussa Niakhate, Ismail Jakobs (Al Hadji Diouf); Habib Diarra, Idrissa Gueye (Nicolas Jackson), Pape Gueye; Iliman Ndiaye, Ismaila Sarr, Sadio Mane (Bara Ndiaye).
Jornalista: Hortêncio Sanchez
Editór: Rafael Ximenes de A. Belo
