KOVALIMA, 02 Jullu 2026 (TATOLI) – Komandu Polísia Nasionál Timor-Leste (PNTL) Munisípiu Kovalima, kontinua halo investigasaun hodi hatene motivu no buka tuir sidadaun feto ida ho inisiál TC, la’o lakon iha mota-masin, iha aldeia Wetaba, Postu Administrativu Tilomar, Munisípiu Kovalima, bainhira fila husi nasaun viziñu Indonézia.
“Ita nia PNTL liuhusi sesaun investigasaun kontinua halo investigasaun hodi rekolla informasaun, nune’e ita seidauk hatene kauza husi sidadaun feto ida ne’ebé lakon ho naran inisiál TC iha fronteira Mota Masin, ne’e deskonfia omesídiu ka avo lafaek mak tata ita seidauk hatene”, Komandante PNTL Munisípiu Kovalima, Superintendente Xefe Paulino Carmo Ferreira relata ba TATOLI iha Komanndu PNTL Kovalima.
Komandante PNTL Kovalima ne’e, konta kronolojia relasiona sidadaun ne’ebé la’o lakon ne’e husi postu administrativu Zumalai, lakon bainhira hamutuk ho nia kolega sira seluk hodi ultrapasa liuhusi fronteira terrestre ba nasaun viziñu indonézia ho sira-nia intensaun atu sa’e sintu.
“Ha’u atu klarifika informasaun relasiona viral iha media sosiál facebook ho sidadaun ho naran inisiál TC ne’ebé lakon iha fronteira mota-masin bainhira husi fronteira Timor-Leste ba iha nasaun viziñu Indonézia no fila iha loron 24 Juñu , maibé to’o semana ida ona mós seidauk to’o iha nia hela fatin, nune’e família buka tuir ba to’o iha fronteira.PNTL Kovalima simu informasaun husi Unidade Polísia Fronteira (UPF) iha loron 30 Juñu”, nia konta.
Hafoin simu informasaun, nia dehan Sesaun investigasaun to’o kedas iha lokál akontesimentu, realidade hatudu katak iha kolam ninin rekolla evidénsia sira hanesan roupa, pasta no sapatu tuir vídeo ne’ebé mak espalla iha mídia Sosiál Facebook maibé la hasoru sidadaun ne’ebé mak lakon ho inisiál TC.
“Sidadaun feto ne’ebé mak tama mai lakon ita la hasoru iha fatin referidu tuir informasaun ne’ebé mak ita rekolla husi família sira mai hamutuk iha fronteira katak avó la faek mak tata, maibé seidauk hatene realidade lakon ka oinsá deskonfia buat oinoin , provizóriu ema sira ne’e ita sei halo investigasaun ohin ita sei lori ba rejistu iha Ministériu Públiku”, komandante ne’e relata.
Bazeia informasaun ne’ebé mak komandu PNTL simu sidadaun fila husi nasaun viziñu hamutuk na’in-10 maibé na’in-ida lakon mak ho inisiál TC ho idade 42, na’in-9 mak fila.Husi sidadaun na’in-9 ne’e lima husi munisípiu Kovalima na’in-tolu husi munisípiu seluk.
PNTL kontinua bolu sasin sira hodi rekolla informasaun kle’an oinsá sira bele tama mai tanba sa na’in-ida lakon, na’in-ida deskonfia avo lafaek tata ne’ebé baixa iha Ospitál no na’in ida kanek lori informasaun buka tuir sidadaun ida ne’ebé mak lakon.
Jornalista: Celestina Teles
Editór: Florencio Miranda Ximenes.
