DILI, 03 Jullu 2026 (TATOLI)—Relasiona ho aniversáriu Ajénsia Notisioza TATOLI, I. P. ba da-X (27 Jullu 2016-27 Jullu 2026), estudante Universidade Nasionál Timor Lorosa’e (UNTL), solisita TATOLI atu fó-sai informasaun ne’ebé kredivel no balansu ba públiku.
Domingos Soares Tilman, nu’udár estudante Departamentu Polítika Públika, hateten Ajénsia Notisioza nu’udár mídia Estatál ida-ne’ebé fornese informasaun ba públiku labele fó-sai informasaun rohan-rohan de’it hanesan loroloron ita haree iha sira-nia portál ne’e.
“Ajénsia TATOLI tenke iha transparénsia ba informasaun hotu-hotu no independente no tenke defende prinsípiu demokrasia, no labele defende elite polítika sira,” nia dehan ba TATOLI, Kampus UNTL, Sesta ne’e.
Notísia relevante: Rui de Araújo espera TATOLI kontinua publika informasaun kona-ba prosesu dezenvolvimentu nasionál
Nia orgullu ba Ajénsia TATOLI tanba bele kobre to’o munisípiu hodi fó-sai informasaun kona-ba preokupasaun no moris komunidade nian loron-loron.
“Liga ho problema sosiál hirak-ne’ebe mak akontese iha área rurál TATOLI sempre atualiza ba públiku, liuliu dezenvolvimento nasional, edukasaun, saúde, ekonomia no polítika. Ajénsia Estadu ne’e arkiva dadus programa no atividade Governu nian,” nia dehan.
Domingos akresenta informasaun hotu-hotu iha Website TATOLI ne’e di’akliu kompara ho mídia nasionál seluk. Tanba bainhira peskiza informasaun ida sempre sai iha google. Ida-ne’e vantajen boot ba públiku, tanba fásil hetan informasaun ne’ebé fó liu ona ka informasaun relevante sira.
Aleinde ne’e, Jonio Soares mós hateten informasaun iha kanál Ajénsia TATOLI asesu ho lalais, fásil no justu, maibé presiza aumenta variedade kontéudu ba juventude no edukasaun. Publikasaun notísia ho lian haat hanesan Tetun, Portugés, Indonézia no Ingléz inklui publikasaun ba dezenvolvimentu vídeo, infográfiku no kontéudu interativu.
“Kontinua mellora rapidéz no kredibilidade informasaun. Hametin prezensa iha mídia sosiál atu atrai juventude no kria programa ka rúbrika espesífika ba estudante no edukasaun. Aleinde ne’e fó oportunidade ba estudante sira atu kontribui hanesan estajiáriu ka kolunista,” nia tenik.
Nia prefere Ajénsia TATOLI kontinua habelar literasia mídia atu ajuda juventude komprende no analiza informasaun ho di’ak.
Nune’e mós, Octavio Rui Tilman Martins dehan Ajénsia TATOLI sempre kontribui informasaun ne’ebé kredivel no justu ba públiku, ida-ne’e mak importante.
Maibé, nia prefere lideransa Ajénsia TATOLI aumenta funsionáriu (jornalista), nune’e bele destaka ba munisípiu sira-ne’ebé TATOLI seidauk kobre, liuliu iha aldeia no suku.
Enkuantu, Nélia Do Santos no Juvito Soares haktuir katak presiza hadi’a kualidade notísia, aumenta interasaun ho estudante no juventude liuhusi mídia sosiál, no fornese informasaun ne’ebé loos, lalais no útil ba komunidade.
“Presiza aumenta konteúdu edukativu no informasaun ne’ebé relasiona ho juventude no edukasaun. Aleinde ne’e, presiza mellora velosidade atualizasaun notísia no uza língua ne’ebé fásil ba públiku bele komprende,” nia fó-hanoin.
Tuir nia, Ajénsia TATOLI fasilita estudante sira bele asesu informasaun TATOLI liu husi Website, Facebook, Instagram no plataforma dijitál seluk ne’ebé TATOLI uza atu fahe notísia no informasaun. Balun mós asesu liuhusi link ne’ebé fahe iha grupu eskola ka universidade.
Portantu, Dencia de Jesus Lay agradese tanba konsidera Ajénsia TATOLI hanesan espasu ba governante sira no sosiedade, maibé husu nafatin publika informasaun ne’ebé adekuada iha nasaun soberanu ida-ne’e.
Jornalista: Osória Marques
Editór: Xisto Freitas da Piedade
