DILI, 03 Jullu 2026 (TATOLI)—Primeiru-Ministru no Ministru Finansa Repúblika Singapura, Lawrence Wong, hato’o agradesimentu no sente kontente tebes ho antuziasmu joventude Timor-Leste no labarik sira-nian ne’ebé horisehik simu nia ho ekipa delegasaun iha Aeroportu Internasionál Prezidenet Nicolau Lobato, Komoro.
“Bainhira ha’u to’o horisehik, ha’u agrdese no kontente tebes ho juventude Timor-Leste nia dinamizmu. Ha’u dehan ba Prezidente horisehik katak asaun fó bem-vindo ne’ebé ami hetan ne’e maka’as tebes no la haluha, ho labarik barak mak hamriik iha dalan ninin atu simu ami-nia delegasaun,” Primeiru-Ministru Singapura, Lawrence Wong, hateten iha Palásiu Prezidensiál Nicolau Lobato, Bairru Pite, ohin.
Xefe Governu ne’e dehan, juventude Timor-Leste nia forsa no determinasaun sei lori nasaun ida-ne’e ba atinei nia metas nasionál, maibé mós sei fó fuan foun ba rejiaun ida-ne’e no halo ASEAN sai maka’as liután.
“Tanba ne’e, ha’u fiar ho Prezidente Repúblika nia vizaun ne’ebé ita-boot hatuur ona ba Timor-Leste nia futuru ne’e inspirativu,” nia fó apresiasaun.
Tamba ne’e, nia afirma Singapura sei kontinua sai parseiru ba Timor-Leste bainhira prezidente foti pasu brani sira atu realiza vizaun ida-ne’e.
“Obrigadu dala ida tan ba onra neʼebé furak tebes ida-ne’e,” nia dehan.
Jornalista : Alexandra da Costa
Editór : Cancio Ximenes
