DILI, 06 Jullu 2026 (TATOLI)-Governu sei fasilita atendimentu ba sidadaun timoroan sira ne’ebé hela iha Portugál hodi renova pasaporte ne’ebé kaduka. Atendimentu ne’e sei hahú iha loron 13 Jullu 2026 iha Embaixada Timor-Leste iha Lizboa.
Vise-Ministru ba Asuntu Parlamentár, Adérito Hugo da Costa, hateten media ida-ne’e atu responde ba preokupasaun deputadu sira-nia kona-ba sidadaun timoroan sira, inklui bolseiru no traballadór sira besik na’in-300 nia pasaporte kaduka ona presiza renovasaun.
Tuir governante, Governu iha semana kotuk halo ona komunikasaun ho Embaixada Timor-Leste iha Portugál hodi informa sidadaun timoroan ne’ebé enfrenta problema pasaporte kaduka.
Nia esplika katak Ministéiru Justisa, liuhusi Embaxada Timor-Leste iha Lizboa, mós halo ona anúnsiu ba komunidade timoroan sira kona-ba abertura servisu renovasaun pasaporte.
“Embaixada Timor-Leste iha Lizboa, iha 13 Jullu, loké atendimentu atu trata pasaporte ne’ebé kadukadu ona”, nia hateten.
Governante ne’e apela ba sidadaun timoroan sira ne’ebé hela iha Portugál atu hakbesik bá embaixada hodi asesu ba atendimentu renovasaun pasaporte ne’ebé Governu prepara.
Notísia relevante: Deputadu FRETILIN husu MJ fasilita renovasaun pasaporte timoroan sira iha Portugál
Jornalista: Nelson de Sousa
Editora: Maria Auxiliadora
