DILI, 10 Jullu 2026 (TATOLI) – Selesaun Fransa susesu hakat liu jornada kuartu finál hodi garante fatin iha semifinál Kopa Mundiál 2026, hafoin halakon Maroko ho eskor 2-0 iha Estádiu Boston, sesta dadeer oras Timor-Leste nian.
Rezultadu husi jogu ne’e konfirma katak Fransa sai nu’udar ekipa dahuluk ne’ebé kualifika ba etapa meia-finál Kopa Mundiál 2026, enkuantu Maroko mós sai hanesan ekipa dahuluk ne’ebé tenke eliminadu iha faze kuartu-finál nian.
Bainhira tiru-bola hahú, Fransa hatudu kedas sira-nia domíniu hodi kria oportunidade osan-mean ida iha minutu haat de’it nia laran. Avansadu Kylian Mbappé ne’ebé simu pasajen husi Désiré Doué iha ninin área penalidade nian, konsege haree abertura no hasai suta maka’as ida, maibé guarda-redes Maroko, Yassine Bounou (Bono), hatudu kualidade hodi salva bola no hamosu de’it suta kantu.
Jogu ne’e la’o manas liután ho presaun kontinuu husi Fransa, ne’ebé Dayot Upamecano nia kabesa-bola husi suta kantu mós tenke salvaguarda fali husi Bono. Fransa hetan tan oportunidade primeiru klase kuandu árbitru hatudu pontu penalidade hafoin Mbappé monu iha área penalti, maibé Bono lee ho loloos Mbappé nia suta ba sorin loos baliza nian hodi kaer metin bola.
Iha minutu 36, Bono frustra fali suta husi Désiré Doué, no besik de’it ka ba primeira parte, Lucas Digne tenta suta espekulativu ida husi dook maibé bola kona de’it trave baliza. Maroko luta maka’as hodi sai husi presaun maibé la konsege kria suta ida ne’ebé loos ba alvu, nune’e primeira parte remata ho eskor mamuk 0-0.
Tama ba segunda parte, selesaun Atlas Lions (Maroko) koko joga ho agresivu liu no foti inisiativa oioin iha minutu lima dahuluk, maibé sira-nia estratéjia seidauk konsege kria oportunidade ne’ebé klaru. Fransa ikusmai konsege silu impase iha minutu 60, liuhusi Kylian Mbappé ne’ebé hasai suta imparável ba baliza nia sorin loos, hodi muda eskor ba 1-0 ba Fransa. Liutiha minutu neen, Fransa duplika kedas sira-nia vantajen ba 2-0 liuhusi golu Ousmane Dembélé; suta husi avansadu PSG ne’e dezvia uitoan hodi tama ba kantu loos baliza Maroko nian.
Maroko tenta responde hodi tula presaun iha minutu 83 liuhusi suta Azzedine Ounahi nian, maibé guarda-redes Fransa, Mike Maignan, mós hatudu nia kualidade hodi salva ninia baliza. Fransa kontinua fó ameasa lian-nakdoko liuhusi Bradley Barcola, Michael Olise, no Dembélé, maibé laiha tan golu adisionál to’o árbitru huu apitu ikus.
Rezultadu finál ne’e hatudu katak Fransa solidu nu’udar ekipa forte liu husi kontinente Europa, ne’ebé konsege mantein sira-nia tátika no dezempeñu di’ak husi faze grupu to’o tama ba semifinál.
Aliñamentu jogadór sira
- Fransa
Iha konfrontu ne’e, Fransa hatuur sira-nia aliñamentu ho Mike Maignan, Jules Koundé, William Saliba, Dayot Upamecano, Lucas Digne, Adrien Rabiot, Manu Koné, Ousmane Dembélé, Michael Olise, Désiré Doué, no Kylian Mbappé.
- Maroko
Enkuantu, Maroko hatán ho jogadór sira hanesan Yassine Bounou, Achraf Hakimi, Noussair Mazraoui, Issa Diop, Anass Salah-Eddine, Ayyoub Bouaddi, Neil El Aynaoui, Brahim Díaz, Azzedine Ounahi, Chemsdine Talbi, no Bilal El Khannouss.
Jornalista: Hortêncio Sanchez
Editór: Rafael Ximenes de A. Belo
