BAUKAU, 13 Jullu 2026 (TATOLI)—Komandu Polísia Nasionál Timor-Leste (PNTL) Munisípiu Baukau liuhusi enkontru koordernasaun husu Organizasaun Arte Marsiál (OAM) atu prevene membru sira utiliza atributu no konvoi bainhira akompaña transladasaun kadáver iha Baukau.
Komandante PNTL Baukau, Superintendente Xefe João Sancho Pires, esplika situsaun jeralmente iha Baukau durante tinan-rua la’o hakmatek maibé presiza haforsa liután kooperasaun ho OAM tanba mosu konflitu eskala ki’ik liuliu serimónia fúnebre balun ne’ebé akontese iha Munisípiu Baukau.
“Ita tenke nafatin tane Baukau no rai ne’e nia naran para kira estabilidade la’o di’ak liután, perturbasaun ki’ik ne’ebé mosu entaun ami bolu atu tau hanoin hamutuk atu hadi’a nune’e ba futuru labele mosu atake iha dalan bainhira translada mate-isin,” João hateten iha ninia kna’ar fatin, Vila Nova, Segunda ne’e.
Superintendente Xefe Pires relata mezmu iha komunikasaun di’ak ho líder OAM maibé membru balun nafatin kria instabilidade liuliu utiliza atributu hodi hala’o konvoiu hodi akompaña tranladasaun isin-mate husi ospitál ba rezisténsia no ba simtériu iha-ne’ebé hetan atake husi membru organizasaun seluk.
Situasaun ne’e akontese bainhira iha semana rua liubá mosu tuda malu entre membru OAM iha área Bolata, Suku Buibau, Postu Administrativu Baukau Vila bainhira translada mate-isin husi Dili atu bá Suku Gariuai.
“Situasaun ne’e ladún di’ak tanba ne’e bolu koordenadór hamutuk ho sub KRAM mai hamutuk foti mekanizmu ruma atu bá-oin labele sai inimigu ba malu. Mate ne’e mate ona maibé ita tenke unidu nafatin,” Superintendente Xefe Pires akresenta.
Pires louva ho kooperasaun mútua entre parte seguransa, Sub-KRAM no OAM ne’ebé hatudu durante tinan-rua laiha konflitu eskala boot iha Baukau maibé presiza hametin nafatin liña komunikasaun ho objetivu atu futuru evita utiliza atributu hodi konvoi nune’e Baukau kontinua iha pás no estabilidade.
Iha fatin hanesan, Prezidente Sub-KRAM Baukau, Padre Justino de Sousa, SDB, hateten inisiativa ne’ebé komandu esforsu nu’udár parte konsiderasaun ba OAM sira nune’e husu membru KRAM atu kontribui hanoin hodi hadi’a, evalua no fó sujestaun nune’e evita instabilidade iha Baukau.
“Ha’u louva ho líder Arté Marsiál tanba hatudu sira-nia responsabilidade. Tanba ne’e, ha’u konkorda liuhusi evaluasaun ne’e ita hadi’a di’ak ba ita-nia rai doben Baukau,” Padre Justino tenik.
Responde ba asuntu ne’e, Koordenadór OAM Persaudaraan Setia Hati Terate (PSHT) Baukau, Alfredo Ximenes, louva ho serbisu seguransa iha Baukau ne’ebé koopera di’ak ho OAM hodi evita instabilidade durante tinan rua maibé bainhira mosu perturbasaun tanba iha provokasaun husi parte seluk.
“Joven hotu sempre hakarak akompaña membru balun mate maibé dalaruma maluk balun la komprende entaun mosu perturbasaun maibé inportante mak presiza fó-hanoin ba líder sira atu atua labele mosu tan iha futuru,” Alfredo informa.
Entretantu, Sub-KRAM Baukau rejista OAM hamutuk neen mak eziste iha Munisípiu Baukau kompostu husi Perisai Diri (PD), Padjajaran, PSHT, ISKP-TL, KORK, THS-THM no Seruling Dewata.
Jornalista: Natalino Belo
Editór: Xisto Freitas da Piedade
