BAUKAU, 15 Jullu 2026 (TATOLI)—Komisaun Nasionál Eleisaun (CNE-sigla portugeza) hahú konstrusaun salaun enkontru nu’udár parte kompleta fasilidade antes realiza eleisan iha Baukau.
Diretór CNE Baukau, Esmeraldo Damião Belo, esplika prosesu konstrusaun uma referida finansia direta husi CNE Nasionál ne’ebé hahú iha inísiu fulan-Juñu tanba fasilita serbisu no kria kondisaun ba realiza enkontru entre funsionáriu, partidu polítiku no parseiru sira bainhira realiza eleisaun iha Baukau.
“Konstrusaun nia durasaun sei finaliza iha finde tinan-ne’e tanba sei utiliza ba eleisaun iha tinan oin,” Diretór CNE Baukau infroma ba TATOLI iha ninia kna’ar fatin, Vila Nova, Kuarta ne’e.
Esmeraldo Belo relata uma ne’ebé antes konstrui iha tempu Indonézia estragadu kauza tempu naruk nune’e deside sobu totál hodi harii foun kompleta ho salaun enkontru inklui fatin serbisu ba ofisiál supervizaun ne’ebé sei rekruta tuir totál sentru votasaun.
Aleinde ne’e, projetu referidu sei kompleta ho postu seguransa edifísiu, morru protesaun no paving iha arredór edifísiu ne’ebé sei apoia atividade CNE hanesan programa edukasaun sívika, formasaun no sosializasaun ba partidu politiku sira-ne’ebé eziste iha Baukau.
“Durante ne’e ita laiha espasu atu akumula partidu polítiku bainhira mosu dezintendimentu iha períodu kampaña, maibé konstrusaun ne’e bainhira finaliza sei fasilita atendimentu,” Esmeraldo esplika.
Entretantu, projetu ne’e responsabiliza husi Kompañia Ramares Boavida Unipessoal, Lda ho totál orsamentu hamutuk $165.097,16 no tuir planu sei termina iha fulan-Dezembru ho durasaun serbisu fulan-neen.
Jornalista: Natalino Belo
Editór: Xisto Freitas da Piedade
