VIKEKE, 15 Jullu 2026 (TATOLI)—Xefe Suku Maluru, Postu Administrativu Vikeke Vila, Munisípiu Vikeke, Bendito Soares, solisita Institutu Jestaun Ekipamentu ba Dezenvolvimentu Infraestutura, Institutu Públiku (IGEADI, I.P.) aselera prosesu normalizasaun estrada husi Naheboruk liga bá Postu Administrativu Uatulari hodi fasilita movimentu komunidade.
“Antes ne’e, ekipa IGEADI halo normalizasaun husi área Naeboruk, Suku Uma-Ua’in Kraik, Postu Vikeke Vila to’o iha mota Metale purvolta kilómetru ida, maibé agora besik fulan-rua resin seidauk kontinua normaliza estrada. Tan ne’e, ami autoridade hakarak husu IGEADI aselera normalzasaun estrada hodi fasilita komunidade nia viajen husi suku no postu bá munisípiu,” Bendito Soares ba TATOLi iha Postu Vikeke Vila, Kuarta ne’e.
Xefe Suku Maluru ne’e dehan inísiu fulan-Abríl 2026 ekipa husi IGEADI mai ateru estrada parte Naheboruk to’o iha mota Metale kapa’as loos, ajuda komunidade no fasilita movimentu sira tanba ateru kabeer—estrada kuak laiha.
“Servisu ida-ne’e mak kontinua karik oras-ne’e liu ona ha’u-nia Suku Maluru, maibé paradu tiha ne’ebé agora foin to’o iha Motale. Kona-ba servisu normalizasaun ne’e ami koopera tebes ho ekipa IGEADI hodi oferese rai-mutin hodi normaliza estrada sira, maibé servisu mak paradu fali ne’e ami sente triste,” nia subliña.
Entretantu, Koordenadór IGEADI, Marcelino Santos Babo, haktuir IGEADI la abandona servisu, maibé problema mak kombustivel difikulta servisu.
“Ami nunka abandona servisu. Kona-ba normalizasaun estrada husi Naheboruk bá Postu Uatulari foin lalais paradu ne’e razaun tanba problema klima (tempu udan) no kombustivel mós laiha. Maibé, horikalan ami lori ona hamutuk tonelada lima (5) ne’ebé ami haree udan para servisu sei kontinua filafali,” nia informa.
Tuir dadus, estrada husi Naheboruk to’o Suku Uma-Ua’in Leten (Uatulari) hamutuk kilómetru 26, IGEADI normaliza ona kilómetru ida. Iha prosesu normalizasaun ne’e ekipa IGEADI ateru rai-mutin ba estrada kuak sira no normaliza bee-dalan sira.
Jornalista: Vitorino Lopes da Costa
Editór: Xisto Freitas da Piedade
