DILI, 15 Jullu 2026 (TATOLI)—Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) rejista ona ba Ministériu Públiku (MP) suspeitu na’in-90 ne’ebé hetan detensaun iha Suku Ulmera, Postu Administrativu Bazartete, Likisá no Kampung Baru, Suku Komoru Postu Administrativu Dom Aleixo tanba hetan intervensaun fragante delitu envolve krime scam.
“Kazu ne’e rasik rejista ona ho númeru NUK parte Ulmera nia 0248/26.PNSIK no iha Kampung Baru ho númeru NUK 0247/26.PNSIK,” Diretór Servisu Investigasaun Kriminál, Superintendente Xefe Polísia João Belo dos Reis, hato’o ba jornalista sira iha Kuartél Jerál PNTL, Kaikoli, Kuarta ne’e.
Nia relata, husi kazu hirak ne’e, Autoridade Seguransa rekolla evidénsia iha Kampung Baru hanesan laptop 12, telefone 18, ekipamentu Starlink, komputadór boot no ekipamentu seluk tan hamutuk unidade 18 inklui karreta no motorizada iha terrenu.
Notísia relevante : Sidadaun estranjeiru 90 suspeitadu atividade scam submete ba identifikasaun
Nune’e mós, Autoridade Seguransa halo apreensaun sasán iha parte Ulmera hanesan komputador boot unidade haat, laptop 70, kadeira, no meza sira, ne’ebé sasán hirak ne’e lori hotu ba prosesu investigasaun hanesan evidénsia.
“Pontu ida-ne’ebé mak relasaun ba prosesuál ha’u sei la ko’alia sai tanba prosesu investigasaun la’o hela, ne’e segredu justisa, ha’u ko’alia sai buat ne’e la la’o. Tanba prosesu ba ida-ne’e ita envolve ema barak, liuliu tracking ba ida-ne’e la’o hela,” nia akresenta.
João Belo hateten, Polísia daudaun ne’e halo tracking ba rede kriminál ida-ne’e tanba rede ida-ne’e konsideradu rede internasionál.
“Tanba ne’e, parseiru sira bele ajuda ita ba informasaun sira,” nia katak.
Nune’e, Diretór Servisu Investigasaun Kriminál husu nafatin públiku, liuliu líder komunitáriu sira hodi bele koopera di’ak ho parte Autoridade Seguransa.
“Karik ema ruma tama ita-boot sira-nia bairru, aluga uma ruma iha ne’ebá, pur favór atu kontrola depois komunika, karik buat ruma ita-boot sira suspeita relasaun ba rede kriminál internasionál ida-ne’e, bele komunika ba ami para ami halo intervensaun,” nia reforsa.
Jornalista : Natalino Costa
Editora : Julia Chatarina
