OEKUSI, 16 Jullu 2026 (TATOLI) – Prezidente Repúblika, José Ramos-Horta, liuhusi nia Gabinete Servisu Sosiedade Sivíl no Asuntu Sosiál, apoia materiál konstrusaun hodi reabilita Eskola Bázika Filiál (EBF) 1, 2, 3 “09 de Setembro” Bobomanat Tumin, ne’ebé lokaliza iha suku Bobometo, sub-rejiaun Oésilo, Rejiaun Administrativa Espesiál Oekusi Ambeno (RAEOA).
Materiál konstrusaun hirak ne’e entrega husi Koordenadora Servisu Sosiedade Sivíl no Asuntu Sosiál iha Gabinete Prezidente Repúblika, Tereza dos Santos Ximenes, ba Diretór Serbisu Rejionál Edukasaun Oekusi, autoridade suku Bobometo, no koordenadór eskola EBF Bobomanat Tumin.
“Apoia ne’e materiál hirak-ne’e nu’udar resposta ba preokupasaun ne’ebé profesór no estudante sira, hato’o rasik ba Prezidente Repúblika, iha Palásiu Prezidente Repúblika Aitarak-klaran Dili, iha tinan-2025 liubá,” hateten Koordenadora Tereza dos Santos Ximenes hateten, tuir komunikadu imprensa ne’ebé Ajénsia TATOLI asesu husi Gabinete Servisu Edukasaun Oekusi, kinta ne’e.
Tereza dos Santos Ximenes esplika katak, ba prosesu reabilitasaun fíziku ne’e, ekipa téknika husi Gabinete Prezidente Repúblika rasik maka sei hala’o konstrusaun direta iha terrenu.
Notísia relevante:Autoridade RAEOA planeia harii eskola foun 14 no reabilita 12 ho emerjénsia
Iha fatin hanesan, Diretór Servisu Rejionál Edukasaun Oekusi, Vincencio Cono, hato’o agradese kle’an ba Xefe Estadu, tanba ho apoia ne’e bele hakma’an ona serbisu Autoridade RAEOA nian, liliu iha setór edukasaun.
“Reprezenta Autoridade RAEOA, hato’o agradese ba apoia tomak mai husi Prezidente Repúblika, Avo Horta. Ami orgullu tanba bele tulun ona serbisu edukasaun Oekusi, tanba apoia materiál konstrusaun atu hadi’a di’akliu tan EBF 1,2,3 iha suku Oésilo suku Bobometo,” Vincencio Cono dehan.
Eskola Bázika Filiál 1, 2, 3 “09 de Setembro” Bobomanat Tumin daudaun ne’e rejista totál estudante ativa hamutuk na’in-474 no profesór na’in-13.
Jornalista: Abílio Elo Nini
Editór: Rafael Ximenes de A. Belo
