DILI, 14 janeiru 2020 (TATOLI) – Ministériu Obras Públiku (MOP) husi Diresaun Jerál Água no Saneamentu (DGAS) liuhusi ekipa task force Diresaun Nasional Servisu Água (DNSA) halo identifikasaun no manutensaun ba kanu distribuisaun bee-moos iha Dili laran tomak.
Notísia Relevante : Bee Moos iha Kapitál Dili Komesa Menus
Durante servisu task force nian ne’e identifika katak, distribuisaun bee-moos ba komunidade la ekilíbriu tanba kauza husi kanu barak kuak, ai-abut halo intúpidu ho mós kanu barak mak ferrujen no kotu.
Xefe Departamentu Abastesimentu Água, Francisco Pereira Xavier, ba Ajénsia TATOLI, ohin, iha nia servisu fatin, Dili, informa, ekipa task force ne’e loron-loron tuun ba halo observasaun no halo atendimentu manutensaun ba liña distribuisaun bee-moos no rezolve kanu sira ne’ebé mak tohar atu bele hadi’a total atu bele asegura fali bee-moos ba komunidade.
Francisco Pereira Xavier mós afirma, kreximentu komunidade iha Dili laran kontribui mós ba distribuisaun bee-moos la sufisiente.
Notísia Relevante : 2020, SAS Kontinua Hadi’a Kanalizasaun Bee-Moos
Jornalista : Osória Marques
Editór : Francisco Simões
