DILI, 02 juñu 2020 (TATOLI) – Durante implementasaun Estadu Emerjénsia (EE) husi primeiru faze too oras ne’e, kazu krime redús maka’as, liu-liu iha area jurizdisaun Kapitál Dili nian.
Komandante Polísia Munisípiu Dili, Superintendente Xefe Armando Monteiro, deklara, kazu krime ne’e redús, tanba públiku liu-liu juventude sira koopera ho autoridade seguransa hodi luta hasoru propagasaun surtu Coronavirus ka COVID-19.
“Ita haree kada kazu krime ne’e redús tebes, tanba primeiru ita nia públiku ninia konsiénsia di’ak tebes, liu-liu iha Dili,” hateten Superintendente Xefe Armando Monteiro, ba jornalista iha Komandu PNTL Munisípiu Dili, tersa (02/06/2020).
Nia informa katak, durante EE ne’e PNTL Dili rejista kazu rua de’it hanesan kazu krime arma branka ne’ebé ema deskoñesidu lori rama ambon hana joven ida iha área Kampu Alor agora ninia prosesu investigasaun la’o hela hodi buka tuir autór sira. Kazu seluk tan maka PNTL mós besik konklui ona investigasaun kazu na’ok sasán eletrónika iha loja Xineza ida nian iha área Comoro, Dili.
Superintendente Xefe Armando hatutan, kona-ba asidente tráfegu, Unidade Tránzitu Dili mós rejista de’it kazu ida ne’ebé akontese iha área Fatu-Ahi nian.
Iha parte seluk, PNTL Dili mós sei kontinua halo operasaun iha tempu kalan no loron, inklui fó konfiansa nafatin ba ekipa PNTL halo pasa revista ba movimentu transporte iha Postu aat ne’ebé harii ona iha Lahane, Becora, Comoro Mota-Ulun no Tasi-Tolu nian.
Jornalista : Eugénio Pereira
Editór : Francisco Simões
