OÉ-CUSSE 03 maiu 2023 (TATOLI) – Prezidente Autoridade Rejiaun Administrativa Espesiál Oé-Cusse Oé-Cusse Ambeno (RAEOA), Arsénio Paixão Bano, kuarta ne’e fó-sai katak, ajenda ba lansamentu estrada nasionál hosi sub-rejiaun Pante Makasar liga ba sub-rejiaun Oésilo sei realiza iha loron 15 fulan maiu tinan ne’e.
“Loron 15 maiu ne’e, ita lansa estrada nasionál Tono ba Oésilo,” Arsénio Paixão Bano, informa ba jornalista sira iha Oé-Cusse.
Notísia relevante: Waskita Karya sei ezekuta projetu estrada nasionál Pante Makasar-Oésilo ho millaun $33-resin
Autoridade ne’e konfirma, iha semana ne’e nia laran, autoridade RAEOA halo negosiasaun, termu kontratu ba projetu Tono ba Oésilo, tanba ne’e projetu nasionál ho millaun $33-resin.
“Primeiru ha’u hato’o ona sujestaun ba Obra Públika ho ekipa negosiasaun ba ita-nia ho kompañia, atu ema traballadór ne’e maioria ema Oé-Cusse ho tékniku sira mós, segundu ekipamentu apoiu ba projetu ne’e, buka iha Oé-Cusse no nasionál la to’o maka ko’alia ho RAEOA atu buka hosi rai-li’urliur,” nia afirma.
Maibé, prioridade mak traballadór ho ekipamentu pezadu sira, presiza rekruta iha rai laran liuliu Oé-Cusse oan sira, tanba Autoridade nia hakarak ema barak tenke servisu iha projetu ne’e.
“Alende kompañia halo serbisu ho kualidade, ita iha kompañia fiskalizadór ida, atu fiskaliza obra sira-ne’e, ita mós sujere atu manán doubru, hosi traballadór, sub-kontratór sira ba futuru bele ezekuta bee-dalan, dreinajen no seluk, ha’u hakarak partisipasaun másimu hosi setór privadu Oé-Cusse nian,” nia espera.
Autoridade prepara ona tékniku sira hosi diresaun tolu Terra Propriedade, Obra Públika no Agrikultura atu halo levantamentu dadis kona-bá afetadu ba rai, uma, no ai-produtiva, nune’e bele hetan kompensasaun hosi Estadu Timor-Leste.
“Iha loron 15 ita lansa dahuluk ba kilómetru 18, ita sei serbisu barak hanesan halo daudaun iha estrada nasionál Noéfefan ba Oénunu Nítibe, Terra Propriedade sei envolve atu identifika rai, Obra Públika atu identifika mós uma afetadu sira, no Diresaun Agrikultura mós sei identifika ai produtiva sira, iha serbisu tolu mak atu halo uluk, antes kompañia hahú halo serbisu,” nia katak.
Notísia relevante: Autoridade RAEOA konsulta komunidade afetadu Nipani molok halo pagamentu
Tuir nia, la’ós serbisu konstrusaun ne’e de’it, maibé multi efeitu ne’e iha, uma troka uma, rai troka rai, bele mós rai sei halo kompensasaun mós, no ai produtiva sira sei halo kompensaun, hanesan saida mak hala’o daudaun iha estrada nasionál Pante Makasar ba Nítibe.
“Diskusaun ba buat sira-ne’e, ita prepara ona, kalkulu finál ba uma afetadu sira-ne’e, iha semana ne’e sei halo aprezentasaun finál iha enkontru autoridade, sé iha ona rezultadu kontinua kedan ba aprovizionamentu atu halo konkursu públiku ba uma 119 ba afetadu estrada nasionál Nítibe nian,” nia tenik.
PR agradese komunidade tanba kontribui iha projetu estrada nasionál ba Nítibe
Entretantu, melloramentu estrada nasionál ne’e sei hahú hosi eis merkadu Tono, suku Cunha, sub-rejjiaun Pante Pante Makasar to’o fronteira Napan, suku Bobometo, sub-rejiaun Oésilo ho distánsia kilómetru 18.
Ezekuta hosi hosi empreza Internasionál PT Waskita Karya, valór kontratu $33,915,000.00 (millaun $33-resin). Orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun serbisu durante tinan rua.
Notísia relevante: Autoridade RAEOA aprova deliberasaun halo pagamentu ba afetadu projetu ZEESM
Jornalista: Abílio Elo Nini
Editór: Evaristo Soares Martins
