COVALIMA, 02 maiu 2023 (TATOLI)—Komandante Autoridade Protesaun Sivil (APC-sigla portugés), Inspetór Xefe, Flavio Dos Santos Mendes, hateten hahú fulan-dezambru tinan 2022-2023, Autoridade Protesaun Sivil (APC-sigla portugés) rejista ona vítima dezastre natural hamutuk uma kain 139.
“Hahú 27 fulan-dezembru tinan 2022 to’o ohin loron iha tinan 2023 ne’e, ami rejista ona vítima dezastre naturál hamutuk uma kain 139 iha munisípiu Covalima,” Inspetór Xefi Flavio dos Santos Mendes hateten ba jornalista sira iha nia kna’ar fatin, Santa Rosa, tersa ne’e.
APC rejista dezastre naturál hamutuk 139 ne’e ho tipu sira hanesan tipu dezasre naturál mak rai halai hamutuk hitu (7), ahi han uma haathamutuk haat (4), anin boot sobu komunidade nia uma hamutuk 128.
“Vítima dezastre naturál 139 ne’e hafoin akontese dezastre ita fó kedas apoiu emerjénsia ba vítima sira, nune’e hodi hein apoiu rekuperasaun,” nia dehan.
Durante APC halo verifikasaun dadus uma sira ne’ebé mak hetan estragu hosi dezastre naturál ho tipu sira hanesan aat kman-67, aat natoon 24, aat totál 47 ne’ebé nia prosesu APC hato’o ona nasionál hetan apoiu materiál rekuperasaun.
“Hafoin prosesu hato’o ba nasionál ita espera iha fulan balun bele hetan nia rezultadu, nune’e vítima dezastre naturál sira bele simu ona materiál rekuperasaun, nune’e vítima sira bele konstrui fali sira-nia uma hodi hela,” nia dehan.
Bazea ba dadus ne’ebé APC rejista dezastre naturál ho tipu anin boot maiória akontese iha postu administrativu Fohorem, Fatululik, Zumalai, Fatumea no Tilomar.
Jornalista : Celestina Teles
Editór : Cancio Ximenes
