DILI, 15 dezembru 2023 (TATOLI) – Orsamentu Jerál Estadu (OJE) 2024 ba Ministériu Edukasaun (ME) ho montante millaun $114,9 aprova ona iha debate espesialidade ho votu afavór 56, kontra rua no abstensaun hitu.
Husi aprovasaun ida ne’e, Ministra Edukasaun, Dulce de Jesus Soares, promete katak sei toma responsabildade hodi ezekuta orsamentu ne’e ho di’ak, nune’e bele responde ba programa prioridade lima ne’ebé maka trasa ona mak funsionamentu no dezenvolvimentu institusionál, edukasaun pré-eskolár, ensinu báziku, sekundáriu no rekorrente.
“Atu garante kualidade iha Ministériu Edukasaun, hahú 2024 ne’e, ami sei halo esforsu lori kualidade ida di’ak liu ba ita-nian edukasaun hodi halakon polémika sira ne’ebé maka durante ne’e akontese iha ita-nian edukasaun”, Dulce de Jesus promete iha Parlamentu Nasionál, ohin.
Alokasaun verba ME nian ne’e tuir kada kategoria sira mak hanesan saláriu no vensimentu millaun $87,4, bens no servisu millaun $11,4, transferénsia públika $9,3, kapitál menór $1,8 no kapitál dezenvolvimentu millaun $5.
Ba programa lima ne’ebé trasa ona ne’e prevee ba funsionamentu no dezenvolvimentu institusionál ho montante millaun $18, edukasaun pré-eskolár millaun $8,5, ensinu báziku millaun $68,9, ensinu sekundáriu millaun $19 no ensinu rekorrente $409.294.
Notísia relevante: Ministériu Edukasaun prevee millaun $114,9 ba prioridade lima
Jornalista: Tomé Amado
Editora: Maria Auxiliadora
