DILI, 31 janeiru 2022 (TATOLI)- Kandidatura Prezidente Repúblika 2022-2027, Armanda Berta dos Santos, hosi Partidu Kmanek Haburas Unidade Timór-Oan (KHUNTO), hahú rejista ona iha Tribunál Rekursu hodi kompete iha Eleisaun Prezidensiál, ne’ebé realiza iha loron 19 marsu tinan ne’e.
“Ohin, ekipa susesu mai kompleta dokumentu eletrónika hodi rejista kandidatura Armanda Berta, ne’ebé iha sesta foin lalais, ita la konsege rejista tanba dokumentu seidauk kompletu,” Portavóz Kandidatura Armanda Berta dos Santos, Marito Magno ba Jornalista Sira iha Tribunál Rekursu- Caicoli, segunda ne’e.
Notísia Relevante: La prenxe rekezitu, TR haruka fila dokumentu kandidatura Armanda Berta
Hafoin kompleta dokumentu, Marito Magno dehan, Tribunál Rekursu simu ona dokumentu kandidatura Armanda Berta Dos Santos.
“Konserteza hosi parte Tribunál Rekursu simu ona hodi kontinua prosesu ba oin tanba kandidatura ne’e ho apoiante hamutuk 8.641 ne’ebé hein Tribunál Rekursu halo verifikasaun,” nia akresenta.
Nune’e, Portavós ekipa susesu ne’e dehan laiha duvida ba nia kandidatura Prezidente Repúblika tanba tuir ona rekezitu ho baze ba lei ne’ebé vigora.
“Ami laiha duvida ho ami nian kandidatura, ami promete sei serbisu makas hodi lori vitória ba kandidatura Prezidente Repúblika Armada Berta. Ami nia abertura kampaña eleitorál sei hala’o iha munisípiu Ainaro,” nia kompromete.
Notísia relevante: Kandidatu PR Lú-Olo rejista ona iha Tribunál Rekursu
Jornalista : Natalino Costa
Editór : Florencio Miranda Ximenes
