DILI, 08 Jullu 2025 (TATOLI)—Xefe Departamentu Forensik iha Hospitál Nasionál Guido Valadares, Nilton Tilman, hatete autopsia ba vitima omesidu jo insiál EDC ne’ebé mate iha Jakarta II, postu administrativu Ainaru, munisípiu Ainaru ne’e finaliza ona no entrega ona ba família atu haloot.
Notísia Relevante: HNGV hein mandadu husi MP hafoin halo autopsia ba kadaver inisiál EDC
“Ohin dadersasan, autopsia hahú iha tuku 10h00 dadeersan hanesan ne’e no finaliza besik tuku 13h00. Ami entrega ona mate-isin ba familia besik tuku 14h00 lorokraik, entaun iha ne’eba, enjerál autopsia la’o ho di’ak,” Nilton Tilman informa ba jornalista sira, iha Mortuáriu HNGV, ohin.
Autopsia ne’e korresponde ho informasaun sira-ne’ebé mai ona antes, hotu hotu haree komentáriu sira iha mídia sosiál no ema barak ko’alia iha ne’e, ho nune’e prosesu autopsia sira-ne’e la’o ho di’ak.
“Ita hotu hatene inisiu kedas kadaver ka mate-isin ne’e ita hetan iha Jakarta II, distánsia metro 500 husi dalan boot so’e tun ba karik no infomasaun dezenvolve rapidu loos. Tuir fontes sira hatene katak iha agresaun fiziku, aktu violénsia ne’ebé husi suspeitu ba vítima. Loos, ha’u la’ós loke prosesu Justisa katak hanesan ha’u ko’alia ona horisehik katak Vitima nia isin-lolon iha kanek barak, hanesan ita-boot sira haree fotografia barak loos, ida-ne’e mak ha’u dehan,” nia esplika.
Nia informa, objetivu husi autopsia ne’e atu rekolla infomasaun no halo estudu ne’ebé mak kle’an liután atu buka kauza ida husi truma sira-ne’e.
Nia afirmam vitima ne’e rasik grávida hela maibé relatóriu seidauk finaliza entaun labele fó sai.
“Loos, vitima grávida hela, ne’e familia rasik mós hatene katak vitima grávida hela. Kona-ba fulan hirak ida-ne’e ha’u la bele ko’alia tanba relatóriu seidauk finaliza, maibé aktus ida vitima garavida ne’e familia mós hatene no autopsia mós bele konfirma. Bainhira relatóriu finaliza sei haruka ba Ministériu Públiku mak ita hotu bele hatene,” nia dehan.
Iha fatin hanesan, vitima nia aman, Guilhermino da Silva, infoma, kronolojia loloos kona-ba nia ona nia mate ne’e, nia ladún hatene tanba nia sai husi uma dehan atu ba Likisa.
“Kronolojia kona-ba ha’u nia oan feto mate ne’e, ha’u la hatene. Tanba, nia sai husi uma dehan mai Likisá atu sosa sasán, maibé atu ba tan ne’ebé ha’u lahatene,” Guilhermino da Silva haktuir.
Nia dehan, matebian sai husi uma iha loron Domingu madrugada, hafoin nia mate fali iha Jakarta II, munisípiu Ainaru ne’e, ida-ne’e hanesan aman hakfodak ho situasaun ida-ne’e.
“Nia sai husi uma iha domingu (06 Jullu)) madrugada no iha loron segunda (07 Jullu) ne’e nia mate iha fatin refere ho razaun saida, ha’u lahatene nusa mak ba mate iha rai do’ok ne’ebá,” nia dehan.
Kona-ba nia iha relasaun ho ema seluk hanesan aman ladúnhatene tanba nia sai husi uma la dehan buat ida.
“Ha’u la hatene tanba nia la dehan ba ha’u antes atu sai husi uma. Hanesan aman, ha’u presiza hatene, ha’u-nia oan atu la’o ho sé, la’o do’ok ka besik, hau tenke hatene atu nune’e hetan problema ki’ik ka boot, ita buka malu resolve. Tanba ne’e, hanesan aman hakarak lori prosesu ne’e ba oin,” nia hateeten.
Jornalista : Felicidade Ximenes
Editór : Cancio Ximenes
