DILI, 07 Jullu 2025 (TATOLI)—Hospitál Nasionál Guido Valadares liuhusi Departamentu Forensik hein mandadu husi Munistériu Publiku hafoin halo autopsia ba kadaver inisiál EDC ne’ebé transporta husi munisípiu Ainaro.
Xefe Departamentu Forensik iha HNGV, Nilton Tilman, hateten daudaun ne’e kadaver ho naran inisial EDC iha ona konzeladór mortuáriu atu halo prosesu autopsia, maibé seidauk bele halo tanba sei hein prosesu mandadu husi Ministériu Públiku.
“Atu halo autopsia, ami hein hela mandadu husi Ministériu Públiku. Bainhira mai ona, ami hahú ezekuta. Ha’u espera katak oras tan nia rezultadu ka klareza ne’e iha ona. No, autopsia muda ba loron ida ka rua. La’ós ita lakohi servisu maibé autopsia teknikamente tenke iha prosesu legál, kulturál, ideál no aspeitu sira seluk bele implika ba kompleksidade ida-nian. Se mandadu mai agora bele se kazu urjénsia ruma no kritéria sira iha ona. Entaun, autopsia ezekuta kedas,” Nilton Tilman hateten ba jornalista sira, iha nia kna’ar fatin HNGV, Bidau, ohin.
Nia relata, kazu ne’ebé akontese área Jakarta II, postu admnistrativu Ainaro Vila. munisípiu Ainaro ne’e ho sidadaun feto ida naran inisial EDC, ne’ebé mak komunidade hetan ho kondisaun mate no sira kontaktu kedas ho Autoridade lokál no Polisia Nasionál Timor-Leste hodi foti nia mate-isin, nune’e dadaun ne’e iha ona konzeladór HNGV mian.
“Iha kadaver feto ida populasaun hetan iha fatin Jakarta II, iha Ainaro ne’ebá, depois sira kontaktu kedas ho Autoridade Lokál no PNTL ba haree no tuir informasaun preliminariu ne’ebé ami hetan no ita hotu akompaña katak vitima feto ida-ne’ebé monu kuaze sira hetan distánsia metro 500 husi dalan boot ne’e. Iha mós informasaun ne’ebé ita hotu akompaña katak iha mós kazu krime halo agregasaun fiziku ruma nia sai ba vitima no haree ba nia faktu sinál, trauma iha kadaver nia isin tuir ita-nia Polisia katak suspeitu iha ligasaun ho kazu krime ka agregasaun fiziku no agora iha prosesu investigasaun nia laran,” nia dehan.
Nia konta, sira halot didi’ak kadaver sira transfere kedas mai iha parte Forensik HNGV horisehik, iha Domingo lorokraik, depois to’o iha ne’e kadaver ne’e konsidera sei deskoñesidu hela mezmuké iha mídia sosiál hotu-hotu hatene katak vitima ne’e husi munisípiu Likisa.
“Ami hanesan Forensik seidauk iha informasaun ofisiál ida katak ida ne’e A ka B, maibé fiar katak sedu ka tarde ita sei hatene kadaver nia identidade loloos,” nia informa.
Nia afirma, daudaun ne’e Forensik prepara hela rekursu umanu hamutuk na’in-neen (6) atu halo autopsia, bainhira iha ona prosesu legál.
Iha fatin hanesan, reprezentante família matebian, Luisinho da Silva Soares, konta katak vitima ne’e horisehik nia sai husi suku asumanu, postu administrativu Likisa Vila, família sira lahatene no mate ona iha Jakarta II mak família sira hakfodak.
“Durante ne’e, matebian laiha problema ho ema seluk no família sira, nune’e kona-ba nia mate ne’e, nia motivu seidauk hatene loloos,” Luisinho da Silva Soares dehan.
Nia esplika, ba familia, nia la iha problema maibé horisehik nia sai mós laiha problema ho familia. Durante ne’e, família mós lahatene kona-ba nia besik ema sé-sé, tanba ida-ne’e entre nia ho ema ida durante telfone malu.
Entretantu, matebian inisiál EDC, idade 23, hamutuk maun alin na’in-haat (4) kompostu husi feto-rua (2) no mane-rua (2) no husik hela oan-ki’ak nai’n-ida (2).
Jornalista : Felicidade Ximenes
Editór : Cancio Ximenes
