KOVALIMA, 24 Juñu 2026(TATOLI) – Autoridade Munisípiu Kovalima liuhusi Sekretáriu Munisipál Asuntu Sosiál no Komunitária, Filomeno Cardoso, hamutuk ho Komandante PNTL Munisípiu Kovalima fó apoia emérjensia ba vítima inundasaun ba xefe família 118 husi Aldeia Akar-Laran, Suku Suai Loro, Postu Administrativu Suai, Munisípiu Kovalima.
Sekretáriu Asuntu Sosiál no Organizasaun Komunitária hanesan mós Koordenadór Jestaun Risku Desastre Munisipál, Filomeno Cardoso, relata iha loron 19-20 fulan-ne’e, udan ho intensidade forte hamosu inudansaun hodi afeta ba komunidade nia hela fatin no mós natar iha Aldeia akar-laran.
“Inundasaun ne’ebé mak akontese foin lalais ne’e afeta ba xefe família 118 ho totál populasaun 368, autoridade fó apoia de’it emerjénsia hodi han no kontinua ida-idak halo limepeza iha ida-idak nia uma,” koordenadór Jestaun Risku Desastre Munisipál Filomeno Cardoso liuhusi nia diskursu molok fo apoiu emerjensia ba vitima sira.
Dezastre naturál ne’ebé la rezulta ba ema nia vida maibé afeta makaas ba komunidade sira nia hela fatin ho natar sira ne’ebe mak iha, nune’e iha momentu ne’e Autoridade Protesaun Sivil, Cruz Vermelha Timor-Leste, Bombeiru evakua kedas família afetadu ba iha Sentru evakusaun Seran kotek.
Iha sorin seluk, Komandante APC Kovalima, Celestino Afonso Ferreira reforsa katak prezensa autoridade protesaun sivil atu fó apoia emerjénsia ba vítima inundasaun husi aldeia Akar-laran.
“Autoridade protesaun sivil mai ajuda ita-boot sira la’os buat boot maibé apoia emerjénsia ita-boot sira bele aguenta han hodi responde ba loron ida-rua hodi aproveita hamoos imi nia uma-laran”, Komandante APC dehan.
Ho nune’e, ba futuru atu labele halo evakuasaun bebeik komunidade sira bainhira autoridade halo observasaun atu rezolve hodi loke bee dalan.
Jornalista:Celestina Teles
Editór:Florencio Miranda Ximenes
