Kovalima, 24 Juñu 2026 (TATOLI) – Prezidente Konsellu Veteranu Munisípiu Kovalima, Francisco Doutel Sarmento “Lamesak”, dehan Veteranu hotu iha Kovalima sente lakon líder di’ak, onestu no umilde.
“Ami sente triste tanba lakon ami nia kolega luta na’in ida ne’ebé hamutuk liberta pátria no iha era ukun-aan mós kontribui makaas ba liberta povu,” katak Veteranu ne’e ho triste.
Ho falesimentu antigun Prezidente Lú-Olo, nia husu ba Ministériu Asuntu Kombatente Libertasaun Nasionál (MAKLN) atu haree no fó atensaun sériu ba tratamentu saúde ba líder istóriku sira iha Timor-Leste (TL).
“Ha’u hato’o ba Ministériu Asuntu Kombatente Livertasaun Nasionál fó atensaun ba líder sira ne’ebé partisipa funu iha ai-laran durante 24. Estadu tenke tau atensaun tanba ita ba halo tratamentu ba ho di’ak fila mai ho kaisaun nusa lakohi ba nasaun Austrália sira,” nia sujere.
Nia mós husu ba Governu atu kontinua tau-matan ba veteran hotu ne’ebé luta ba ukun-rasik aan tanba barak mak hetan ona moras no presiza halo duni tratamentu saúde.
“Presiza atu fó atensaun ba tratamentu saúde ba líder istóriku sira, nune’e sira bele ho kondisaun di’ak tanba ho sira nia sakrifisiu luta ba ukun rasik-aan mak ohin lorin Timor-Leste hetan ukun rasik-aan,” nia rekomenda.
Jornalista:Celestina Teles
Editór:Florencio Miranda Ximenes
