DILI, 10 agostu 2021 (TATOLI)—Polísia Repúblika Indonézia (POLRI) liuhosi Komandu Belu, kaptura no halo detensaun ba Timoroan na’in 113 iha área Atambua, Nusa Tenggara Timur (NTT).
Informasaun ne’ebé Agência Tatoli asesu hosi parte Konsuladu Timor-Leste (TL) iha Atambua, katak entre Timoroan hirak-ne’e, iha mós feto na’in-ualu, ne’ebé autoridade seguransa Atambua kaptura iha segunda (09/08) kalan.
Notísia relevante:PNTL kaptura tan sidadaun na’in-rua ho atributu GAM
Timoroan hirak ne’e deskonfia nu’udár membru organizasaun Grupu Arte Marsiál (GAM), ne’ebé autoridade seguransa detein, hafoin indentifika sira-nia viazen ilegál hosi TL tama Atambua atu tuir ezame sa’e sintu.
Oras-ne’e daudaun, autoridade seguransa Atambua detein hela sidadaun hirak-ne’e iha sela polisia Polda Atambua, hodi hein prosesu investigasaun.
Ohin mós Konsuladu TL iha Atambua Indonézia, João Simão Sousa, hamutuk ho ekipa hala’o kedan vizita hodi haree direta kondisaun, inklui koordena ho autoridade seguransa Atambua hodi buka solusaun.
Jornalista: Nelson de Sousa
Editór: Cipriano Colo
