DILI, 31 jullu 2023 (TATOLI) – Ajénsia Nasionál Avaliasaun no Akreditasaun Akadémika (ANAAA) rekomenda pontu tolu ba Institute of Business (IOB) atu halo mak reforsa dosente lokál iha programa mestradu ba kontabilidade, reforsa rekursu Internal Quality Assurance (IQA) no apoia livru foun ba mestradu kontabilidade atu tulun repozitóriu dijitál iha programa mestradu ne’e rasik.
Reitór Interinu IOB, Vasio Sarmento Soares, afirma ANAA halo ona avaliasaun, durante loron rua, ba programa mestradu ba kontabilidade. Husi avaliasaun ne’e hatudu rezultadu di’ak no iha rekomendasaun importante tolu maka IOB tenke toma atensaun, nune’e bele dezenvolve di’ak liután programa mestradu IOB nian iha futuru.
Vasio Soares salienta katak IOB presiza aumenta dosente lokál iha programa mestradu ne’e tanba durante ne’e dosente internasionál maka maioria hanorin iha programa refere, nune’e IOB sei konsidera ANAAA nia rekomendasaun ne’e.
Institutu mós sei moderniza repozitóru dijitál ne’ebé iha ona atu hadi’ak nia konteúdu sira, nune’e ba futuru estudante sira bele asesu ho di’ak. “Tanba konteúdu repozitóriu husi jornál inklui literatura dijitál no e-book ne’ebé IOB iha ona, tuir avaliasaun ANAAA nian seidauk sufisiente atu apoiu programa mestradu ne’e rasik. Tanba ne’e tenke halo modernizasaun di’ak liután iha futuru”, reitór interinu informa ba Tatoli via telefone.
Avaliadór ANAAA mós sujere ba IOB atu aumenta rekursu, tanba IOB nia IQA ne’e iha ona kapasidade, maibé kuantidade maka sei menus, tanba durante ne’e seidauk instala membru IQA iha kada departamentu ka programa estudu sira.
“ANAAA haree katak sistema hanesan ne’e la benefisia estudante sira, entaun rekomenda mós tenke instala membru IQA iha kada departamentu ka programa estudu sira, nune’e bele halo kedan serbisu no bele update informasaun mai IQA sentrál atubele atende kedan”, salienta.
ANAAA sei halo mós avaliasaun ba kursu jestaun finansa iha Fakuldade Ekonomia, jestaun informátika (D3) no kursu Siénsia Ekonomia Estudu ba Dezenvolvimentu.
Jornalista: Tomé Amado
Editora: Maria Auxiliadora
