DILI, 05 abríl 2022 (TATOLI)—Diretór Departamentu Prensaun no Sobrevivente, Manuel dos Santos, hateten benefisiáriu ba “bolsa estudu ba vfeteranu nia oan sira” ne’e tenke benefisiáriu ida-ne’ebé frekuente hela eskola mak bele asesu maibé veteran nia oan ne’ebé la eskola ne’ebé sei labele asesu.
“Ita rejistu vaga 1,300 ba benefisiáriu kombatente nia oan ne’e tenke frekuente hela eskola mak bele asesu bolsa estudu. Ida-ne’eb’e la eskola ne’e labele asesu bolsa estudu refere,” Manuel dos Santos relata ba Agência TATOLI, iha nia knaar fatin Caicoli, Dili, tersa ne’e.
Tanba, nia haktuir, tuir despaixu diploma ministeriál númeru 1 hateten katak tinan ne’e Governu preeve miliaun $1,111 hodi bele atribui ba benefisiáriu ka ba vaga 1,300 ne’e.
Hosi benefisiáriu 1,300 ne’e, ema 130 ba ensinu báziku primeiru siklu no 130 ba ensinu báziku segundu no terseiru siklu, depois 130 ensinu sekundáriu no 910 ba universitáriu rai-laran.
Nia hateten, kada munisípiu sei hetan vaga ka benefisiáriu hamutuk 100 no hosi númeru ne’e vaga 70 ba universitáriu no ensinu báziku no sekundáriu hetan de’it 10.
Tuir nia, bolsa estudu ne’e hahú iha tinan 2009 maibé la’ós ba kombatente nia oan de’it maibé uluk ne’e fó ba mártires sira-nia oan tanba bazea ba dekretu númeru 8/2009.
Maibé rejime atribuisaun ne’e ba mártires nia oan, depois iha primeira alterasaun dekretu lei númeru 8/2009 ba dekretu lei númeru 4/2020 ne’e fó dalan ona no la’ós ba mártires nia oan de’it, maibé ba kombatente ne’ebé mate no moris ne’ebé simu hela pensaun fulan-fulan bele asesu ba vaga ne’e.
“Entaun iha 2022 ne’e ita fó vaga 1,300 ne’ebé mak barak liu tinan-tinan antes, tanba bazea ba primeira alterasaun dekretu lei númeru 4/2022 fó biban instituisaun atu ita hasa’e tan númeru vaga,” nia esplika.
Hosi tinan 2009 to’o tinan 2019, benefisiáriu hamutuk 2,277 kompotu hosi benefisiáriu ne’ebé eskola iha rai-liur 103 no seluk mesak hala’o sira-nia estudu iha universidade sira iha rai-laran de’it.
Jornalista : Osória Marques
Editór : Cancio Ximenes
