DILI, 18 Setembru 2025 (TATOLI)—Ministru Asuntu Kombatente Libertasaun Nasionál (MAKLN), Gil da Costa Monteiro “Oan Soru”, informa Banco O Nosso Futuro (BNF) ne’e nakloke ba timoroan sira asesu inklui estranjeiru.
“BNF loke hela dalan ba timoroan sé de’it, inklui estranjeiru sira-ne’ebé mak estadia iha Timor-Leste,” Oan Soru hateten ba jornalista sira iha Palásiu Governu, Kinta ne’e.
Oan-Soru dehan la kle’ur tan ema sira-ne’ebé loke konta bankária BNF nian, bele ona foti osan iha munisípiu hotu-hotu ho Automated Teller Machine (ATM-P24).
“Maibé, aban bainrua kuandu ATM ne’e sai, ATM ne’e P24. Ne’ebé, nia bele kaer ATM BNF ninian, bele bá foti osan iha ATM seluk nian, bele hotu de’it. Tanba ne’e, regulariza hosi Banku Sentrál. Tanba regra sira-ne’ebé mak Banku daudaun estabelese iha territóriu, ema ne’ebé simu osan hosi dolar rihun-ida mai kraik, uza ATM de’it, la forma hanesan uluk. Ne’ebé, ATM ne’e ATM P24, bele funsiona iha Mandiri, BNU no iha-ne’ebé de’it ATM ne’e funsiona hotu,” Ministru “Oan Soru haktuir.
Notísia relevante: Banco do Nosso Futuro ofisialmente hahú halo operasaun
Relasiona ho mudansa Konta-Bankária, Oan-Soru hateten desizaun sira kona-ba mudansa konta bankária hosi banku sira seluk mai loke hotu iha BNF, ne’e direitu kada veteranu no sidadaun idak-idak nian. Maibé, nu’udár timoroan presiza hanoin katak BNF ne’e timoroan sira-nian rasik, iha-ne’ebé harii liuhosi ema ki’ik no mukit sira-nian osan.
“Atu loke sira-nia konta bankária bá iha ne’ebé de’it, ne’e sira-nian direitu. BNF ne’e timoroan nian rasik. Ne’e maihusi sira ne’ebé mukit, susar. Ita-boot sira hanoin ne’e hili hosi $1 mak ikus mai prenxe rekizitu hotu-hotu Estadu Timor-Leste ninian, no regulamentu sira hotu-hotu hosi Banku Sentrál, ikusmai sai banku ida. Ne’e la fásil,” Ministru tenik.
Governante ne’e dehan presiza ema hotu-hotu atu hamutuk, hodi halo buat ne’ebé difísil bele nakfilak ba realidade. Hamutuk ida-ne’e presiza duni kontribuisaun ema hotu nian, hahú hosi ema ki’ik no ema boot. Maski nune’e, tuir nia, la signifika Ministru atu ‘obriga’ fali ema hotu-hotu.
Iha parte seluk, Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, esklarese fundu kontributivu husi veteranu hamutuk 27.600 ne’e, atinje ona millaun $50.
Jornalista: Osória Marques
Editór: Xisto Freitas da Piedade
